اسلام آباد ۔ 24 اکتوبر (اے پی پی) رواں مالی سال کی پہلی سہ ماہی کے دوران لیدر گارمنٹس کی برآمدات میں 41.72 فیصد کا اضافہ ہوا ہے۔ادارہ برائے شماریات پاکستان (پی بی ایس) کی رپورٹ کے مطابق گزشتہ مالی سال 2018-19ء کے پہلے 3 ماہ کے دوران 2 لاکھ 34 ہزار درجن لیدر گارمنٹس برآمد کئے گئے جن کی مجموعی مالیت 8 ہزار 359 ملین روپے رہی۔جبکہ رواں مالی سال 2019-20ء کے اسی عرصہ کے دوران لیدر گارمنٹس کی برآمدات 3 لاکھ 22 ہزار درجن تک بڑھ گئیں جن کی مجموعی مالیت 11ہزار 846 ملین روپے تک پہنچ گئی۔اس طرح گزشتہ مالی سال 2018-19ء میںجولائی تا ستمبر کے مقابلہ میں رواں مالی سال 2019-20ء کے اسی عرصہ کے دوران لیدر گارمنٹس کی برآمدات میں 3 ہزار 487 ملین روپے یعنی 41.72 فیصد کا اضافہ ہوا ہے۔
