ماؤنٹ ایوریسٹ سے کچرا اٹھانے کے لیے ڈرونز کا استعمال

کھٹمنڈو ۔26اگست (اے پی پی):ماؤنٹ ایوریسٹ سے کچرا اٹھانے کے لیے ڈرونز کا استعمال شروع کردیا گیا۔اے ایف پی کے مطابق ماؤنٹ ایوریسٹ کو کچرے سے پاک کرنے کے لیے پہلی بار بھاری بھرکم ڈرونز کا استعمال کیا گیا۔ نیپالی کمپنی ایئرلفٹ ٹیکنالوجی نےدو جدید DJI FC 30 ہیوی لفٹر ڈرونز کے ذریعے کیمپ 1 سے 300 کلوگرام کچرا نیچے منتقل کیا۔

کمپنی کے نمائندے راج بکرم مہارجن نے کہاکہ ڈرونز نہ صرف وقت اور لاگت میں بچت کر رہے ہیں بلکہ کوہ پیماؤں کی حفاظت میں بھی معاون ثابت ہو رہے ہیں۔ یہ ڈرونز آکسیجن، رَسی اور دیگر سامان کی ترسیل کے لیے بھی استعمال ہو رہے ہیں۔ کمپنی اگلے ماہ یہی منصوبہ ماؤنٹ مناسلو پر بھی شروع کرے گی۔