اسلام آباد۔2دسمبر (اے پی پی):نگراں وزیر خارجہ جلیل عباس جیلانی کہاہے کہ ماحولیاتی تبدیلیوں کے مسائل پر عالمی برادری کے ردعمل سے انسانیت کے مستقبل کا تعین ہوگا۔ وزارت خارجہ کی جانب سے جاری ہونے والے بیان کے مطابق انہوں نے یہ بات ہفتہ کودوبئی میں کوپ۔ 28 کے موقع پر موسمیاتی تبدیلیوں پرگروپ 77 اورچین کے اجلاس میں پاکستان کی نمائندگی کرتے ہوئے کہی۔
وزیرخارجہ نے کہاکہ موسمیاتی تبدیلوں کے مسائل سے نمٹنے کیلئے اقدامات کے ضمن میں وعدوں پر عمل درآمد کو تیز کرنے میں تمام ممالک کا کردار اہمیت کاحامل ہے ۔انہوں نے کہاکہ گزشتہ سال کوپ 27 کے موقع پر گروپ 77 اورچین کے اجلاس میں پاکستان کی چئیرمین شپ میں موسمیاتی تبدیلیوں سے ہونے والے نقصانات کیلئے فنڈ کے قیام کا تاریخی اقدام کیاگیا، موسمیاتی تبدیلی کے حوالہ سے تمام شعبہ جات بشمول موافقت اورموزونیت ، موسمیاتی مالیات اورنقصانات کے ضمن میں گروپ کے اہداف کے حصول کیلئے ہمیں اسی اتقاق کی ضرورت ہے۔
وزیرخارجہ نے درجہ حرارت میں 1.5 سینٹی گریڈ کے ہدف کو جاری رکھنے پرزوردیتے ہوئے کہاکہ ترقی یافتہ ممالک کو موسمیاتی تبدیلیوں کے منفی اثرات کوکم کرنے والے اقدامات میں قائدانہ کرداراداکرنا چاہئیے۔ وزیرخارجہ نے موسمیاتی تبدیلیوں سے نمٹنے کیلئے ترقی پذیرممالک کی مالی معاونت اورماحولیاتی موزونیت کی ضرورت پربھی زوردیا۔
Short Link: https://urdu.app.com.pk/urdu/?p=415888
