اسلام آباد ۔ 17 اپریل (اے پی پی) ماریشیس کی صدر ڈاکٹر بی بی آمینہ فردوس گریب فاطم پاکستان کے چار روزہ دورے پر اتوار کو یہاں پہنچ گئی۔ اس دورے کے دوران پاکستان اور ماریشیس کے درمیان مختلف شعبوں میں دوطرفہ تعاون کو مزید فروغ دینے سے متعلق امور کا تفصیل سے جائزہ لیا جائے گا۔ وہ صدر ممنون حسین کی دعوت پر نو رکنی وفد کے ہمراہ پاکستان کا دورہ کر رہی ہیں۔ نور خان ایئر بیس آمد پر وزیر مملکت انفارمیشن ٹیکنالوجی انوشہ رحمن نے ان کا خیر مقدم کیا۔ اس موقع پر قومی لباس میں ملبوس دو بچوں نے معزز مہمان کو گل دستہ پیش کیا۔ دورہ پاکستان کے دوران وہ صدر مملکت ممنون حسین سے ملاقات کریں گی۔
