اسلام آباد ۔ 29اگست (اے پی پی)ترجمان وزارتِ داخلہ نے مجلسِ وحدت المسلمین کے سربراہ علامہ راجا ناصر عباس جعفری کے بیان پر ردعمل کا اظہار کرتے ہوئے واضح کیا ہے کہ وزیرِداخلہ کی جانب سے مجلسِ وحدت المسلمین کے ساتھ نہ تو کوئی وعدہ کیا گیا اور نہ ہی ہڑتال ختم کرنے کے سلسلے میں کوئی یقین دہانی کرائی گئی تھی۔پیر کو جاری بیان میںترجمان نے کہا وزیرِداخلہ جب5اگست کو علامہ ناصر عباس جعفری کی بیمار پرسی کے لئے ہسپتال گئے تھے تو دوران عیادت اس حد تک بات ضرور ہوئی کہ اگر مجلسِ وحدت المسلمین کوئی شرط نہ رکھے تو وزیرِداخلہ صوبائی حکومتوں سے ان کے معاملات طے کروانے میں معاونت کریں گے۔ترجمان نے کہا کہ وزیرِداخلہ چوہدری نثار علی خان کی بھرپور کوشش رہی ہے کہ صوبائی حکومتوں کی مشاورت سے ایم ڈبلیو ایم کے مطالبات کا مناسب حل تلاش کیا جائے تاکہ ایم ڈبلیو ایم کی قیادت احتجاج ترک کر کے اہم قومی امور پر حکومت کی رہنمائی کر سکے مگران کے کردار کو غلط معنی پہنانا سراسر زیادتی ہے۔
