لاہور۔26اکتوبر (اے پی پی):محکمہ زراعت پنجاب نے چنے کی فی ایکڑ زیادہ پیداوار کےلئے سفارشات جاری کر دیں ۔ ترجمان محکمہ زراعت نے بتایا کہ کاشتکار چنے کی بہتر پیداوار کے لئے دیسی چنے کی محکمہ زراعت کی سفارش کردہ ترقی دادہ اقسا م سٹار چنا،بٹل2022 ، ٹی جی سٹرائیکر،سٹار چنا،بٹل2021 ،بہاولپور چنا21 ،تھل2020 ،بٹل 2016 ،نیاب سی ایچ 104 ،نیاب سی ایچ 2016 ،بھکر2011 ،پنجاب 2008 اوربلکسر2000 کاشت کریں،اس کے علاوہ محکمہ زراعت کی سفارش کردہ کابلی چنے کی ترقی دادہ اقسام نور2022 ، روہی چنا21 ،نور2019 ،نور2013،ٹمن2013 ،نور2009 اور سی ایم2008 کا صحت مند بیج استعمال کریں،
چنے کی کاشت سے پہلے بیج کی سفارش کردہ سرائیت پذیر زہر اور جراثیمی ٹیکہ ضرور لگائیں،چنے کی کاشت تھل کے بارانی علاقوں میں 31اکتوبر ، جہلم ،راولپنڈی ،گجرات اور ناروال میں10نومبرتک اور آبپاش علاقوں میں 15 نومبر تک مکمل کرلیں۔انہوں نے کہا کہ پنجاب کے دیگر آبپاش علاقوں میں کاشت15 نومبر تک مکمل کرلیں،زیادہ زرخیز اور ستمبر کاشتہ کماد میں 10 نومبر تک چنے کی کاشت مکمل کرلی جائے،کاشتکار چنے کی کاشت سے قبل بیج کو پھپھوندی کش زہر اور جراثیمی ٹیکہ ضرور لگائیں،
دیسی و کابلی چنے کی عام جسامت والے دانوں کا صاف ،صحت مند بیج30 کلوگرام اور موٹے دانوں کی اقسام کا 35 کلوگرام بیج فی ایکڑ استعمال کریں،چنے کی کاشت بذریعہ ڈرل یا پور کریں تاکہ بیج کی روئیدگی اچھی ہو،قطاروں کا درمیانی فاصلہ30 سینٹی میٹر(1 فٹ) اور پودوں کا درمیانی فاصلہ15 سینٹی میٹر(6انچ) ہونا چاہیے،میرا زمینوں اور زیادہ بارش والے علاقوں میں قطاروں کا درمیانی فاصلہ 45 سینٹی میٹر(ڈیرھ فٹ) رکھیں،آبپاش علاقوں میں چنے کو ڈیرھ بوری ڈی اے پی کھاد فی ایکڑ ڈالیں،
کھاد بوائی کے وقت زمین کی تیاری کے دوران ڈالنی چاہیے۔انہوں نےکہا کہ بارانی علاقوں میں جہاں وتر موجود ہو وہاں ڈیرھ بوری ڈی اے پی فی ایکڑ بوقت کاشت ڈالیں اورجن ریتلے بارانی علاقوں میں بوائی بغیر زمین کی تیاری کی جاتی ہے وہاں کھاد سیاڑوں کے ساتھ ڈرل کریں۔
Short Link: https://urdu.app.com.pk/urdu/?p=517200
