فیصل آباد۔ 07 فروری (اے پی پی):محکمہ زراعت نے کماد کے کاشتکاروں کو ممنوعہ اقسام ٹرائی ٹران، سی اوایل 54،انڈین سی او 1148،ایل 118،ایس پی ایف 238،بی ایل 4، ایل 116، ایل 118اور بی ایف 162وغیرہ کاشت نہ کرنے کی ہدایت کرتے ہوئے کہا ہے کہ کاشتکار کماد کی اگیتی ترقی دادہ اقسام سی پی ایف 243، ایچ ایس ایف 240،سی پی400۔77، درمیانی ترقی دادا اقسام ایس پی ایف 245،ایس پی ایف 234، ایس پی ایف 226،ایس پی ایف 213 اورپچھیتی ترقی دادہ اقسام سی او جے 84 وغیرہ کی کاشت سے بہترین فصل حاصل کرسکتے ہیں۔
ڈائریکٹر محکمہ زراعت توسیع فیصل آباد چوہدری خالد محمود نے کہا کہ کماد کو ہماری زرعی معیشت میں ایک اہم نقد آور فصل کی حیثیت حاصل ہے جبکہ رقبہ کے لحاظ سے گنے کا شمار گندم، کپاس، چاول کے بعد چوتھے نمبر پر ہوتا ہے نیز ملکی استحکام،چینی کی ضرورت پوری کرنے اور کاشتکاروں کی خوشحالی کیلئے گنے کی پیداوار میں اضافہ ازحد ضروری ہو گیا ہے جس کیلئے کاشتکار حضرات کو چاہیے کہ وہ جدید پیداواری ٹیکنالوجی پر عملدر آمد کریں۔انہوں نے کہا کہ بہاریہ کماد کی کاشت وسط مارچ تک مکمل کر لینی چاہیے۔
Short Link: https://urdu.app.com.pk/urdu/?p=556979
