کوئٹہ۔ 18 مارچ (اے پی پی):محکمہ کھیل حکومت بلوچستان کے زیر اہتمام صوبہ بھر میں یوم پاکستان کی مناسبت سے سپورٹس فیسٹیول میں مختلف کھیلوں کے مقابلے جاری ہیں۔ فیسٹیول میں فٹسال ووشو اور باسکٹ بال کے مقابلوں کا بھی آغاز ہوگیا ہے۔ فٹسال ٹورنامنٹ کا آغاز کوئٹہ کے علاقے سیٹلائٹ ٹاؤن کیو ڈی اے گراؤنڈ میں ہوا۔ افتتاحی تقریب کے مہمان خاص پاکستان پیپلز پارٹی کے رہنماو رکن اسمبلی اورپارلیمانی سیکرٹری لیاقت علی لہڑی تھے جبکہ باسکٹ بال کے مقابلے پاکستان سپورٹس بورڈ کوئٹہ سینٹر میں ہوئے جس کا افتتاح بلوچستان اولمپک ایسوسی ایشن کے جنرل سیکرٹری شیر محمد ترین نے کیا۔ ووشو کے مقابلے ایوب سپورٹس کمپلیکس مارشل آرٹس جمنازیم میں شروع ہوئے ہیں۔
باسکٹ بال کے مقابلوں میں کوئٹہ کی 6 ٹیموں نے حصہ لیا ہے جبکہ ووشو کے مقابلوں میں 7 مختلف ویٹ کیٹیگریز ہیں۔ ایونٹ میں کوئٹہ سے 35 کھلاڑیوں نے حصہ لیا ہے۔ فٹسال ٹورنامنٹ کے مہمان خصوصی میر لیاقت علی لہڑی نے باقاعدہ طور پر ٹورنامنٹ کا افتتاح کیا۔ اس موقع پر آرگنائزنگ کمیٹی کے ممبر عبدالباقی ، محمد صادق سمیت تماشائی بھی بڑی تعداد میں موجود تھے، افتتاحی تقریب کے موقع پر مہمان خصوصی کا کھلاڑیوں سے خصوصی تعارف بھی کرایا گیا۔ میر لیاقت علی لہڑی نے اس موقع پر بات چیت کرتے ہوئے کہا ہے کہ 23 مارچ یوم پاکستان کی مناسبت سے سپورٹس فیسٹول کا انعقاد خوش آئند ہے، اس سے کھلاڑیوں کو کھیلنے کے مواقع میسر آئیں گے، بلوچستان حکومت کھیلوں کے فروغ اور کھلاڑیوں کو کھیلنے کے مواقع فراہم کے لیے کوشاں ہے۔
Short Link: https://urdu.app.com.pk/urdu/?p=573918
