رباط۔27فروری (اے پی پی):مراکش کے شاہ محمد ششم نے مراکش کے شہریوں سے خشک سالی کے بعد مویشیوں کی تعداد میں کمی آنے کے باعث مراکش کے شہریوں سے عید الاضحیٰ پر قربانی نہ کرنے کی اپیل کی ہے۔ اردو نیوز کے مطابق انہوں نے گزشتہ روز مراکش کے شہریوں سے کہا ہے کہ وہ رواں سال عید الاضحیٰ کے موقع پر جانور ذبح کرنے سے گریز کریں کیونکہ برسوں کی خشک سالی کے بعد مویشیوں کی تعداد میں کمی آئی ہے۔
شاہ محمد ششم کی جانب سے ایک خط وزیر برائے مذہبی امور احمد توفیق نے سرکاری ٹی وی الأولى پر پڑھا۔ہمارا یہ عزم ہے کہ آپ کو اس مذہبی عبادت کو بہترین حالات میں ادا کرنے کا موقع فراہم کیا جائے لیکن اس کے ساتھ ساتھ ہمارے ملک کو درپیش موسمی اور اقتصادی چیلنجز کو مدنظر رکھنا بھی ضروری ہے، جن کی وجہ سے مویشیوں کی تعداد میں نمایاں کمی آئی ہے۔
سرکاری اعدادوشمار کے مطابق مسلسل خشک سالی کی وجہ سے رواں برس مویشیوں کی تعداد میں 38 فیصد کمی آئی ہے۔مراکش کے بادشاہ محمد ششم نے کہا کہ ان مشکل حالات میں یہ مذہبی فریضہ ادا کرنا ہمارے ملک کے ایک بڑے طبقے، خاص طور پر محدود آمدنی والے لوگوں کو نمایاں طور پر نقصان پہنچائے گا۔ گزشتہ 30 برس کی اوسط بارشوں کے مقابلے میں رواں برس 53 فیصد کم بارشیں ہوئیں، جس کی وجہ سے مویشیوں کے لئے چراہ گاہوں کی کمی ہوئی ہے۔
گوشت کی پیداوار میں بھی کمی آئی ہے جس کے باعث مقامی مارکیٹ میں قیمتیں بڑھ گئی ہیں اور زندہ مویشیوں، بھیڑوں اور سرخ گوشت کی درآمدات میں اضافہ ہو گیا ہے۔ مراکش نے حال ہی میں آسٹریلیا سے ایک لاکھ بھیڑیں درآمد کرنے کے معاہدے پر دستخط کئے ہیں۔مراکش نے 2025 کے بجٹ میں مویشیوں اور سرخ گوشت پر درآمدی ڈیوٹی اور ویلیو ایڈڈ ٹیکس معطل کر دیا ہےتاکہ مقامی مارکیٹ میں قیمتوں کو مستحکم رکھا جا سکے۔
Short Link: https://urdu.app.com.pk/urdu/?p=566962
