مدینہ منورہ ۔ 10 اپریل (اے پی پی) سعودی ہنر مندوں نے مسجد نبوی کیلئے ”ای سم“ سے آراستہ قالین تیار کرلئے ہیں۔ یہ نئے قالین سبز رنگ کے قالین چھت سمیت ہر جگہ بچھائے جائیں گے۔ سعودی میڈیاکے مطابق مسجد الحرام اور مسجد نبوی کی جنرل پریذیڈنسی کے سربراہ شیخ عبدالرحمن السدیس نے مسجد نبوی کیلئے 20ہزار 700نئے قالین کے سودے پر دستخط کردیئے۔ ہر قالین میں ڈیجیٹل کوڈڈ سم لگی ہوئی ہے جس میں اس کی تیاری کی تاریخ، استعمال کے طریقے کب اور کتنی بار اس کی صفائی کی جائے گی اور کب قالین زائد المیعاد ہوجائے گا کے متعلق تمام تفصیلات درج ہیں۔ نئے قالینوں کی پہلی کھیپ رمضان المبارک 1440ھ میں بچھائی جائے گی۔
