نیو یارک ۔26ستمبر (اے پی پی):وزیر خارجہ شاہ محمود قریشی نے کہا ہے کہ اقوام متحدہ میں افغانستان کی معزول حکومت کےافغان سفیر کی نشست کا کوئی جواز نہیں ہے، جنگ زدہ ملک کی اقوام متحدہ کی نشست ابھی خالی رکھنی چاہیے۔ نیو یارک ٹائمز میں اتوار کو شائع ہونے والے ایک انٹرویو میں کہا ہے کہ غلام اسحاق زئی جنہیں ابھی تک اقوام متحدہ میں افغانستان کے سفیر کے طور پر سرکاری طور پر تسلیم کیا جا رہا ہے اور پیر کو جب 193 رکنی باڈی اپنی اعلیٰ سطحی بحث سمیٹنے جا رہی ہے اس میں بھی بات چیت کے لئے انکا نام درج ہے۔
غلام اسحاق زئی کو سابق افغان صدر اشرف غنی نے طالبان کے افغانستان پر قبضے سے چند ماہ قبل مقرر کیا تھا۔ دریں اثنا طالبان نے درخواست کی ہے کہ دوحہ میں طالبان کے ترجمان سہیل شاہین کو اسحاق زئی کی جگہ تبدیل کیا جائے اور انہیں جنرل اسمبلی میں بولنے کی اجازت دی جائے۔ شاہ محمود قریشی کا کہنا تھا یہ دیکھنا باقی ہے کہ طالبان کی درخواست جائز ہے یا نہیں۔
انہوں نے یہ بھی کہا کہ اسحاق زئی کا اقوام متحدہ میں افغانستان کی نمائندگی کا حق قابل دفاع نہیں ہے کیونکہ ان کی حکومت ختم ہو چکی ہے اور اس کے صدر اشرف غنی بیرون ملک فرار ہو چکے ہیں۔ شاہ محمود قریشی نے اسحاق زئی کے بارے میں پوچھا کہ وہ ان کے لیے بات کرنے والے کون ہوتے ہیں؟۔
انہوں نے کہا کہ افغانستان کی اقوام متحدہ کی نشست کے لیے بہترین قلیل مدتی حل یہ ہے کہ اسے خالی رکھا جائے ۔ انہوں نے اسحاق زئی سے بات کرنے کے خیال کو بھی مسترد کردیا اور کہا کہ ”اس کاکیا فائدہ ؟۔ انہوں نے کہا میرے نزدیک اس کا کوئی مقصد نہیں ہے۔ اقوام متحدہ کے ترجمان سٹیفن دوجارک نے ایک ای میل پیغام میں کہا کہ "ابھی تک ، افغانستان کا نمائندہ پیر کی فہرست میں ایم اسحاق زئی درج ہے۔
اقوام متحدہ میں افغانستان کا صحیح نمائندہ کون ہونا چاہیے ، جنرل اسمبلی کی اسناد کمیٹی ، نو رکنی گروپ ، جس میں چین ، روس اور امریکہ شامل ہیں ، کو یہ سوال اٹھانا چاہیئے۔ ہفتہ کو لندن روانگی سے پہلے وزیر خارجہ کا انٹرویو کرنے والے نمائندے رک گلیڈ سٹون نے کہا کہ رپورٹ کے مطابق کمیٹی کی طرف سے اکتوبر یا اس کے بعد تک اسے حل کرنے کی توقع نہیں ہے۔ اگرچہ پاکستان کمیٹی میں نہیں ہے ، اس معاملے پر شاہ محمود قریشی نکتہ نظر اہم ہے کیونکہ ان کا ملک افغانستان کے سب سے بااثر پڑوسیوں میں سے ایک ہے ،
جسے طالبان کے کنٹرول میں آنے پر نمایاں اثر پڑتا ہے۔ اقوام متحدہ کی نمائندگی کے لیے طالبان کی درخواست کی تائید نہ کرتے ہوئے ، وزیر خارجہ شاہ محمود قریشی نے اخبار کو بتایا کہ انہوں نے کہا کہ 20 سال بعد تقریبا ایک ماہ قبل امریکی انخلاکے بعد سے انہوں نے افغانستان میں بہتر استحکام کے اشارے دیکھے ہیں۔
انہوں نے مزید کہا کہ حیرت کی بات یہ ہے کہ طالبان کی فتح پر افغانستان میں کم از کم اب تک خانہ جنگی کے کوئی آثار نہیں ہیں ۔ انہوں نے کہا کہ نہ ہی پاکستان نے سرحد پار افغان شہریوں کی آمد دیکھی ہے۔
انہوں نے یاد دہانی کراتے ہوئے کہا کہ پاکستان پہلے ہی اپنے مغربی ہمسایہ ملک میں طویل جنگ سے لاکھوں پناہ گزینوں کی میزبانی کر رہا ہے۔انہوں نے کہا کہ ہمارے پاس مزید کی گنجائش نہیں ہے۔ وزیر خارجہ نے کہا کہ اگرچہ پاکستان نے افغانستان کے ساتھ سرحد پر حفاظتی باڑ لگا دی ہے تاہم سرحد اس وقت کھلی ہے اور اس بہتر صورتحال کی وجہ سے لوگوں نے واپس جانا شروع کر دیا ہے۔
وزیر خارجہ نے اس خدشے کا اظہار کیا کہ افغانستان میں انسانی اور معاشی تباہی ابھی بھی ایک حقیقی خطرہ ہے۔ وزیر خارجہ نے پاکستان کو امریکہ کا ” معاون حلیف “ قرار دیا ۔ انہوں نے کہا کہ پاکستان کے امریکہ کے خلاف کام کرنے کے بارے میں کوئی بھی خیال غلط بیانی ہو گا
