اسلام آباد۔25اپریل (اے پی پی):محکمہ موسمیات کے مطابق آئندہ چوبیس گھنٹوں کے دوران ملک کے جنوبی علاقوں میں موسم شدید گرم رہنے کا امکان ہے تاہم خیبر پختونخوا، خطہ پوٹھوہار، شمال مشرقی پنجاب، گلگت بلتستان اور کشمیر میں مطلع جزوی ابر آلود رہنے کے علاوہ چند مقامات پر تیز ہوائوں ،آندھی اور گرج چمک کے ساتھ بارش جبکہ بعض مقامات پر ژالہ باری بھی ہو سکتی ہے۔
رپورٹ کے مطابق استور میں 2 ملی میٹر بارش ریکارڈ کی گئی۔ریکارڈ کئے گئے زیادہ سے زیادہ درجہ حرارت کے اعدادوشمار کے مطابق شہید بینظیر آباد میں درجہ حرارت 47، سبی، جیکب آباد 46، دادو، تربت، لاڑکانہ اور مٹھی میں 45 ڈگری سینٹی گریڈ ریکارڈ کیا گیا۔
محکمہ موسمیات نے درجہ حرارت میں اضافہ کے حوالہ سے انتباہ جاری کرتے ہوئے کہا ہے کہ 26 اپریل تا یکم مئی کے دوران ملک کے جنوبی علاقوں (سندھ، جنوبی پنجاب اور بلوچستان) میں دن کا درجہ حرارت معمول سے 5 سے 7 ڈگری سینٹی گریڈ زیادہ رہنے جبکہ 27 سے 30 اپریل کے دوران ملک کے بالائی علاقوں (وسطی،بالائی پنجاب، اسلام آباد، خیبر پختونخوا، کشمیر، گلگت بلتستان) میں دن کا درجہ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے۔
Short Link: https://urdu.app.com.pk/urdu/?p=587905
