ملتان۔ 10 مئی (اے پی پی):سیکرٹری زراعت پنجاب افتخارعلی سہو نے کہا ہے کہ ملکی برآمدات کے حجم میں اضافہ کیلئے کپاس کی پیداوار میں اضافہ ناگزیر ہے۔ یہ بات سیکرٹری زراعت پنجاب افتخار علی سہو نے ہفتہ کو یہاں محمد نواز شریف زرعی یونیورسٹی میں کپاس کی کاشت بارے جائزہ اجلاس کے دوران گفتگو کرتے ہوئے کیا۔
سیکرٹری زراعت پنجاب کی زیر صدارت اجلاس میں اسپشل سیکرٹری زراعت جنوبی پنجاب سرفراز حسین مگسی، چئیرمین نیشنل سیڈ اتھارٹی ڈاکٹر آصف علی، وائس چانسلر ایم این ایس یونیورسٹی پروفیسر ڈاکٹر اشتیاق احمد رجوانہ، ایڈیشنل سیکرٹری زراعت ٹاسک فورس پنجاب محمد شبیر احمد خان، ڈائریکٹر جنرلز زراعت چوہدری عبدالحمید، نوید عصمت کاہلوں، ڈاکٹرساجد الرّحمان، ڈاکٹر عبد القیوم، عامر رسول، کنسلٹنٹ محکمہ زراعت پنجاب ڈاکٹر محمد انجم علی اور ترقی پسند کاشتکار خالد محمود کھوکھر، سید حسن رضا، زرعی سائنسدان ڈاکٹرمحمد اقبال بندیشہ سمیت چیف انجینئرز محکمہ انہار، ڈائریکٹرز زراعت ملتان، ڈی جی خان اور بہاولپور نے شرکت کی جبکہ دیگر ڈویژنل ڈائریکٹرز زراعت توسیع نے آن لائن شریک ہوئے۔
سیکرٹری زراعت نے کہا کہ صوبہ پنجا ب میں 35 لاکھ ایکڑ رقبہ پر کپاس کی کاشت کا ہدف مقرر کیا گیا ہے، اب تک 22 لاکھ ایکڑ سے زائد رقبہ پر کپاس کی کاشت مکمل کی جا چکی ہے۔ انہوں نے کہا کہ کپاس کی کاشت کا آخری مرحلہ 25 مئی تک جاری رہے گا،بہاولپور ڈویژن کوحقیقی معنوں میں کاٹن ویلی بنانے کیلئے خصوصی مراعاتی پیکج دیا جا رہا ہے،
کپاس کے ماڈل فارمز کی سیلیکشن کا عمل جاری ہے،کپاس کے علاقوں میں نہری پانی کی وافر فراہمی یقینی بنائی جارہی ہے۔انہوں نے مزید کہا کہ اگیتی کاشتہ کپاس کی بہتر نگہداشت بارے رہنمائی کا عمل جاری ہے،کپاس کے کاشتکاروں کی رہنمائی کیلئے متعلقہ فارمیشنزکو خصوصی ٹاسک سونپ دیا گیا ہے،کپاس کی کاشت اور بہتر پیداورکے اہداف اور حاصل کرنے کیلئے ہر ممکن اقدامات اٹھائے جا رہے ہیں۔
Short Link: https://urdu.app.com.pk/urdu/?p=595300
