اسلام آباد۔10اپریل (اے پی پی):وفاقی وزیر خزانہ سینیٹر محمد اورنگزیب نے پاکستان کے موسمیاتی اور پائیدار ترقیاتی اہداف سے متعلق مالی معاونت کے ایجنڈے کو آگے بڑھانے میں اقوام متحدہ کے ترقیاتی ادارہ یواین ڈی پی کے تعاون کو سراہتے ہوئے بین الوزارتی کمیٹی کوپاکستان میں ڈھانچہ جاتی اصلاحات اور ماحولیاتی لچک کے اہداف سے ہم آہنگ سرمایہ کاری کے قابل منصوبوں کی تیاری پر مشترکہ طور پر کام کرنے کی ہدایت کی ہے۔انہوں نے یہ بات یواین ڈی پی پاکستان کے وفد کے ساتھ فالو اپ ملاقات میں کہی۔
وفد کی قیادت یواین ڈی پی پاکستان کے ریزیڈنٹ نمائندہ ڈاکٹر سیموئیل رزق کررہے تھے۔ ملاقات کے دوران یواین ڈی پی کی ٹیم نے پاکستان میں سرمایہ کاری اور ماحولیاتی فنانسنگ کے حصول کے لیے قابل سرمایہ کاری منصوبہ جات کی تیاری میں جاری تکنیکی معاونت پر بریفنگ دی۔ ڈاکٹر رزق نے اس سال سپین میں ہونے والی چوتھی بین الاقوامی کانفرنس برائے ترقیاتی معاونت سے متعلق بھی آگاہی فراہم کی۔
ملاقات میں قابل سرمایہ کاری منصوبوں کے پورٹ فولیو کو حتمی شکل دینے اور چوتھی بین الاقوامی کانفرنس برائے ترقیاتی معاونت میں پاکستان کی موثر شرکت کو یقینی بنانے پر گفتگو ہوئی۔ ڈاکٹر رزق نے حکومت پاکستان کے پالیسی اقدامات کو سراہتے ہوئے کہا کہ حکومت ترقیاتی شراکت داروں کے ساتھ مل کر سرمایہ کاری اور ماحولیاتی فنانسنگ کے شعبے میں موثر پیش رفت کر رہی ہے۔
انہوں نے پاکستان کے بہتر ہوتے ہوئے معاشی اشاریوں اور مارکیٹ ریٹنگز کو اجاگر کرتے ہوئے کہا کہ چوتھی بین الاقوامی کانفرنس برائے ترقیاتی معاونت پاکستان کے لیے بین الاقوامی سرمایہ کاروں سے روابط اور عالمی موسمیاتی و ترقیاتی فنانسنگ کے حصول کا ایک اہم موقع ہے۔
ڈاکٹر رزق نے وفاقی وزیر خزانہ کی سابقہ رہنمائی کی روشنی میں بتایا کہ یواین ڈی پی نے وزارتِ موسمیاتی تبدیلی و ماحولیاتی ہم آہنگی اور پبلک پرائیویٹ پارٹنرشپ اتھارٹی کے تعاون سے پانچ ابتدائی قابل سرمایہ کاری منصوبوں کی تخصیص کی ہے جن کی مجموعی مالیت ایک ارب امریکی ڈالر سے زائد ہے۔ ان منصوبوں کا تعلق ماحول دوست برآمدات، بایو ویسٹ مینجمنٹ، سڑکوں کے بنیادی ڈھانچہ، مقامی گرین پرائیویٹ سیکٹر کی ترقی، اور گرین رئیل اسٹیٹ سے ہے۔
ڈاکٹر رزق نے مزید بتایا کہ اقوام متحدہ کے محکمہ برائے اقتصادی و سماجی امور کا ایک مشن اگلے ہفتے اسلام آباد کا دورہ کرے گا، جو وفاقی و صوبائی حکومتوں، کلیدی شراکت داروں اور نجی شعبے کے ساتھ مشاورتی اور صلاحیت سازی کے سیشنز منعقد کرے گا تاکہ سپین میں منعقدہ کانفرنس میں پاکستان کی شرکت کے لیے تیاری مکمل کی جا سکے۔ وفاقی وزیر خزانہ نے پاکستان کے ماحولیاتی اور پائیدار ترقیاتی اہداف سے متعلق فنانسنگ ایجنڈے کو آگے بڑھانے میں یواین ڈی پی کے تعاون کو سراہا۔
انہوں نے حکومت کی جانب سے مکمل تعاون کی یقین دہانی کااعادہ کیا اور بین الوزارتی کمیٹی جس میں وزارت خارجہ، منصوبہ بندی و ترقی، موسمیاتی تبدیلی، اقتصادی امور، خزانہ اور P3A کے سینئر افسران شامل ہیں ، کو ہدایت کی کہ وہ پاکستان کی ساختی اصلاحات اور ماحولیاتی لچک کے اہداف سے ہم آہنگ سرمایہ کاری کے قابل منصوبوں کی تیاری پر مشترکہ طور پر کام کریں۔ وزیر خزانہ نے حکومت پاکستان یواین ڈی پی اور دیگر ترقیاتی شراکت داروں کے ساتھ قریبی تعاون کے ذریعے پائیدار اور جامع اقتصادی ترقی کو فروغ دینے کے عزم کااظہارکیا۔
Short Link: https://urdu.app.com.pk/urdu/?p=580430
