لاہور۔6مارچ (اے پی پی):موٹروے پر تیز رفتاری پر پہلی ایف آئی آر درج کرکے ڈرائیور کو گرفتار کر لیا گیا۔ترجمان موٹر وے پولیس کے مطابق ملتان کے قریب موٹروے ایم4 پر گاڑی 173 کلومیٹر فی گھنٹہ کی غیرقانونی رفتار پر جا رہی تھی، تھانہ بدھلہ سنت ملتان میں غفلت اور تیز رفتار ڈرائیونگ کی دفعات کے تحت مقدمہ درج اورڈرائیور رحیم خان کو حراست میں لے کر مقامی پولیس کے حوالے کر دیا گیا۔ترجمان موٹروے پولیس نے مزید بتایا کہ تیز رفتاری کے خلاف سخت اقدامات جاری اور موٹرویز پر 150 کلومیٹر سے زائد رفتار پر مقدمہ درج کیا جا رہا ہے۔
ترجمان نے بتایا کہ لاہور سیالکوٹ موٹر وے پر 2 گاڑیوں کے خلاف ایف آئی آر درج کی گئی ہیں۔اسی طرح موٹروے ایم 4 اور 5 پر 3 گاڑیوں کے خلاف ایف آئی آر درج کی گئی ہے، موٹر وے پولیس نے ڈرائیورز کو گاڑیوں سمیت تحویل میں لے کر مقامی پولیس کے حوالے کیا۔ موٹروے پولیس کی مدعیت میں درج مقدمے میں غفلت اور تیز رفتار ڈرائیونگ کی دفعات شامل کی گئی ہیں۔
انہوں نے بتایا کہ تین لین والی موٹروے پر کار کی حد رفتار 120 کلومیٹر جبکہ پبلک سروس گاڑیوں کے لیے رفتار کی حد 110 کلومیٹر ہے۔ترجمان نے کہاکہ آئی جی موٹروے پولیس رفعت مختار راجہ کی ہدایات پرتیز رفتار گاڑیوں کے خلاف خصوصی مہم جاری اورقومی شاہرات پر محفوظ سفر موٹروے پولیس کی اولین ترجیح ہے۔
Short Link: https://urdu.app.com.pk/urdu/?p=569622
