مچھ میں خفیہ معلومات پر مبنی کارروائی میں دو دہشت گرد ہلاک، ایک گرفتار، آئی ایس پی آر

راولپنڈی۔9اپریل (اے پی پی):سکیورٹی فورسز نے بلوچستان میں مغربی سبی کے عمومی ایریا مچھ میں خفیہ معلومات کی بنیاد پر بھرپور آپریشن کے دوران تین رکنی دہشت گرد پارٹی کو روکتے ہوئے دو دہشت گردوں کو ہلاک اور ایک کو گرفتار کر لیا ۔ پاک فوج کے شعبہ تعلقات عامہ (آئی ایس پی آر) کی طرف سے اتوار کوجاری بیان کے مطابق سبی کے مغربی علاقے مچھ میں سرگرم دہشت گردوں کے ایک گروپ کو روکنے کے لیے 7 اپریل سے انٹیلی جنس پر مبنی سینسیٹائزیشن آپریشن شروع کیا گیا تھا۔

دہشت گرد علاقے میں شہریوں کو نشانہ بنانے کے علاوہ کوئلے کی کان کے مالکان سے پیسے بٹورنے کے لیے ہراساں کر رہے تھے۔ مصدقہ اطلاعات کی بنیاد پر دہشت گردوں سے اس علاقے کو پاک کرنے کے لئے مختلف مقامات پر متعدد گھات لگائے گئے جو گزشتہ دو دنوں سے جاری تھے ۔ جس کے نتیجے میں تین دہشت گردوں کی ایک پارٹی کو ان کے ٹھکانے کی طرف بڑھتے ہوئے گھیرے میں لے لیا گیا۔

گھیرے میں آنے پر دہشت گردوں نے سکیورٹی فورسز پر فائرنگ کردی۔ اس دوران فائرنگ کے تبادلے کے دوران دو دہشت گردوں کو جہنم واصل کر دیا گیا جبکہ ایک کو گرفتار کر لیا گیا۔ اس کے علاوہ دہشت گردوں کے زیر استعمال اسلحہ اور گولہ بارود کا ذخیرہ بھی برآمد کیا گیا ہے۔ پریس ریلیز میں مزید کہا گیا کہ ان کے باقی ساتھیوں کی گرفتاری کے لیے علاقے میں کلیئرنس آپریشن جاری ہے۔ آئی ایس پی آر نے کہا ہے کہ پاکستانی فوج بلوچستان کے امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہے۔