اسلام آباد۔2مئی (اے پی پی):نائب وزیراعظم اور وزیر خارجہ سینیٹر محمد اسحاق ڈار نے جمعہ کو ڈنمارک کے وزیر خارجہ لارس لوکے راسموسن سے ٹیلی فون پر بات چیت کی۔ دفتر خارجہ کے مطابق نائب وزیراعظم نے وزیر خارجہ راسموسن کو بدلتی ہوئی علاقائی صورتحال اور بھارت کے بے بنیاد الزامات اور اس کے یکطرفہ اور اشتعال انگیز اقدامات کے جواب میں پاکستان کی قومی سلامتی کمیٹی کے اقدامات سے آگاہ کیا۔
انہوں نے سندھ طاس معاہدے کو التواء میں رکھنے کے بھارت کے فیصلے کو سختی سے مسترد کیا جو معاہدے کی دفعات اور بین الاقوامی قوانین کی صریح خلاف ورزی ہے۔ نائب وزیراعظم نے گفتگو میں علاقائی امن و سلامتی، اپنی خودمختاری اور قومی مفادات کے تحفظ کے لیے پاکستان کے کردار اور عزم کا ذکر کیا ۔ وزیر خارجہ راسموسن نے کشیدگی میں اضافے پر تشویش کا اظہار کرتے ہوئے دونوں فریقوں کی جانب سے تحمل کا مظاہرہ کرنے کی اہمیت پر زور دیا۔
دونوں رہنمائوں نے اقوام متحدہ کی سلامتی کونسل کے غیر مستقل رکن کی حیثیت سے علاقائی اور عالمی پیش رفتوں پر سلامتی کونسل میں قریبی رابطہ برقرار رکھنے پر اتفاق کیا۔ انہوں نے دوطرفہ تعاون کو مضبوط بنانے خاص طور پر معیشت اور سرمایہ کاری کے شعبوں کے ساتھ ساتھ اعلیٰ سطح کے تبادلوں کو فروغ دینے پر بھی اتفاق کیا۔
Short Link: https://urdu.app.com.pk/urdu/?p=591393
