اسلام آباد ۔ 3 اپریل (اے پی پی) وزیراعظم عمران خان نے بدھ کی رات پیرودہائی کے قریب پناہ گاہ کا اچانک دورہ کیا اور شب معراج کی مبارک رات کے موقع پر انہوں نے پناہ گاہ میں موجود افراد کےلئے مہیا سہولیات کا جائزہ لیا۔ وزیراعظم نے پناہ گاہ میں موجود افراد سے سہولیات کے بارے میں استفسار کیا اور مناسب سہولیات کی فراہمی پر انہوں نے اطمینان کا اظہار کیا۔ اس موقع پر وزیراعظم عمران خان نے کہا کہ بے گھر اور بے سہارا افراد کی کفالت ریاست کی ذمہ داری اور پی ٹی آئی حکومت کے ایجنڈے کا بنیادی جزو ہے، نادار افراد کی کفالت کے حوالہ سے حکومت ہر ممکن کوشش کرے گی۔ انہوں نے کہا کہ پورے ملک میں مزید پناہ گاہیں قائم کی جائیں گی اور موجودہ پناہ گاہوں کو مزید وسیع کیا جائے گا تاکہ زیادہ سے زیادہ افراد مستفید ہو سکیں۔ وزیراعظم نے کہا کہ پناہ گاہوں کی تعمیر کے سلسلہ میں مخیر حضرات کا تعاون اور پیشکش حوصلہ افزاءہے۔
