لاہور۔11جولائی (اے پی پی):معروف کلاسیکی موسیقی کے استاد سلامت علی خان کی 23 ویں برسی 11 جولائی بروز جمعرات کو منائی گئی ،انہیں اپنے مداحوں سے بچھڑے 23 سال گزر گئے۔ استاد سلامت علی خان 12 دسمبر 1934 کو بھارت کے ضلع ہوشیار پور کے علاقے شام چوراسی میں پیدا ہوئے، انہوں نے کم عمری میں ہی نام کے ساتھ استاد کا خطاب پا کر کلاسیکی موسیقی کو عروج بخشا، شام چوراسی گھرانے کی وجہ شہرت اس میں پیدا ہونے والے مقبول گائیک ہیں جن میں استاد سلامت علی خان کو ممتاز مقام حاصل ہے۔
سلامت علی خان نے بڑے بھائی استاد نزاکت علی خان کیساتھ جالندھر کے سالانہ میلے میں پہلی کلاسیکل پرفارمنس دی اور شائقین کے دل جیت لیے۔ قیام پاکستان کے بعد وہ بھارتی حکومت کی مراعات کی پیشکش ٹھکرا کر لاہور آ گئے، استاد سلامت علی خان کو پنج پٹیہ گلوکار کے لقب سے نوازا گیا اور حکومت پاکستان نے انہیں صدارتی تمغہ برائے حسن کارکردگی وستارہ امتیاز عطا کیا۔ گلوکار استاد سلامت علی خان11 جولائی 2001 کو اپنے خالق حقیقی سے جا ملے ۔
Short Link: https://urdu.app.com.pk/urdu/?p=483904
