نرسنگ کی بہتری کےلئے اقدامات جاری، سرکاری ہسپتالوں میں نرسیں بہترین فرائض سر انجام دے رہی ہیں،خواجہ سلمان رفیق

لاہور۔19مئی (اے پی پی):وزیر صحت پنجاب خواجہ سلمان رفیق نے کہا ہے کہ نرسنگ کا شعبہ نظام صحت میں ریڑھ کی ہڈی کی حیثیت رکھتا ہے، وزیر اعلیٰ مریم نواز شریف کے وژن کے مطابق اس شعبے کی بہتری کےلئے اقدامات اٹھائے جا رہے ہیں، حال ہی میں محکمہ سپیشلائزڈ ہیلتھ کیئر اینڈ میڈیکل ایجوکیشن نے تین ہزار نرسوں کی بھرتی کا عمل مکمل کیا ہے جنہیں جدید تقاضوں کے مطابق ریفریشل کورسز کروائے جا رہے ہیں، سرکاری ہسپتالوں میں نرسیں بہترین فرائض سر انجام دے رہی ہیں۔

ان خیالات کا اظہار انہوں نے علامہ اقبال میڈیکل کالج میں انٹرنیشنل نرسز ڈے 2025 کی مناسبت سے منعقدہ تقریب میں بطور مہمان خصوصی خطاب کرتے ہوئے کیا۔انہوں نے کہا کہ نرسنگ کا شعبہ نظام صحت میں ریڑھ کی ہڈی کی حیثیت رکھتا ہے،بھارتی حملوں میں زخمی پاکستانیوں کو سرکاری ہسپتالوں میں بہترین طبی سہولیات فراہم کی گئیں۔

ان کا کہنا تھا کہ عالمی ادارہ صحت کی مطابق شعبہ نرسنگ کو جدید تقاضوں کے مطابق پروان چڑھانا چاہتے ہیں،پنجاب حکومت نرسنگ کا معیار یقینی بنانے اور نرسوں کی کمی پوری کرنے کےلئے بنیادی اقدامات اٹھا رہی ہے، یونیورسٹی آف ہیلتھ سائنسز کے اشتراک سے شعبہ نرسنگ کی بہتری کےلئے اہم اقدامات اٹھائے جا رہے ہیں۔

وزیر صحت نے کہا کہ حکومت پنجاب نے نرسنگ کری کولم کو عالمی معیار کے مطابق اپ ڈیٹ کر دیا ہے،اس شعبے کی بہتری کےلئے نرسنگ ایجوکیٹرز کی بھرتی، نرسز پریکٹیشنرز کے دائرہ کار میں وسعت اور ریموٹ ایریاز کی سٹوڈنٹس کو سکالرشپس و انیشیٹوز دیے جا رہے ہیں، رواں برس 1400 مزید سٹوڈنس سپیشل ایوننگ بیچ کو جوائن کریں گی۔

خواجہ سلمان رفیق نے تمام نرسز کی خدمات کو بے حد سراہا۔ ترجمان میڈیکل کالج کےمطابق تقریب میں ایڈیشنل سیکرٹری ڈاکٹر وحید اصغر، پرنسپل علامہ اقبال میڈیکل کالج پروفیسر طیبہ وسیم، ایم ایس جناح ہسپتال ڈاکٹر سید محسن علی شاہ، پرنسپل کالج آف نرسنگ ڈاکٹر فرزانہ، ڈی جی نرسنگ طاہرہ پروین اور نرسوں کی کثیر تعداد نے شرکت کی۔

Short Link: https://urdu.app.com.pk/urdu/?p=598684