اسلام آباد۔26مارچ (اے پی پی):طلبہ کی عالمی تعلیم اور کیریئر کے مواقع کو بڑھانے کے لیے ایک اہم پیش رفت کے طور پر نیشنل یونیورسٹی آف ماڈرن لینگویجز، وزارت وفاقی تعلیم و پیشہ ورانہ تربیت اور نیشنل ووکیشنل اینڈ ٹیکنیکل ٹریننگ کمیشن (نیوٹیک) نے سہ فریقی مفاہمتی یادداشت پر دستخط کیے ہیں، جس کے تحت وفاقی دارالحکومت کے ثانوی اور اعلیٰ ثانوی طلبہ کو بین الاقوامی زبانوں کی تربیت فراہم کی جائے گی۔
یہ فلیگ شپ پروگرام آئندہ پانچ سالوں میں 10,000 طلبہ کو بین الاقوامی زبانیں سیکھنے کی مہارتوں سے آراستہ کرے گا، تاکہ وہ اعلیٰ تعلیمی مواقع اور عالمی روزگار کی مارکیٹ میں بہتر مواقع حاصل کر سکیں۔ اس اقدام کے تحت آٹھ بین الاقوامی زبانوں کی تربیت فراہم کی جائے گی، جن میں جاپانی، چینی، کورین، جرمن، عربی، ہسپانوی، فرانسیسی، اور روسی زبانیں شامل ہیں۔
اس موقع پر ایک اعلیٰ سطحی دستخطی تقریب وزارت وفاقی تعلیم میں منعقد ہوئی، جس میں وفاقی وزیر برائے وفاقی تعلیم و پیشہ ورانہ تربیت ڈاکٹر خالد مقبول صدیقی، ریکٹر نمل میجر جنرل (ریٹائرڈ) شاہد محمود کیانی ہلال امتیاز (ملٹری)، اسپیشل سیکرٹری وزارت تعلیم محی الدین احمد وانی، اور ایگزیکٹو ڈائریکٹر نیوٹیک محمد عامر جان نے شرکت کی۔
تقریب سے خطاب کرتے ہوئے وفاقی وزیر ڈاکٹر خالد مقبول صدیقی نے نمل اور نیوٹیک کو اس شاندار اقدام پر مبارکباد دی اور اس اشتراک کو ممکن بنانے میں اپنی ٹیم کی کوششوں کو سراہا۔ انہوں نے زبان دانی کی مہارتوں کی اہمیت پر زور دیتے ہوئے کہا کہ یہ اقدام پاکستانی نوجوانوں کے لیے تعلیمی اور پیشہ ورانہ مواقع کو مزید وسیع کرے گا۔اس منصوبے کے پہلے مرحلے میں نمل پہلے ہی 1,000 سے زائد طلبہ کو پانچ بین الاقوامی زبانوں میں تربیت فراہم کر چکا ہے، جو اس اقدام کے مستقبل میں مزید توسیع کی بنیاد بنے گا۔
ریکٹر نمل، میجر جنرل (ریٹائرڈ) شاہد محمود کیانی نے قومی ترقی کے لیے یونیورسٹی کے عزم کا اعادہ کرتے ہوئے وزارت وفاقی تعلیم کا زبانوں کی تعلیم کو فروغ دینے میں مسلسل تعاون پر شکریہ ادا کیا۔اسپیشل سیکرٹری وزارت تعلیم، محی الدین احمد وانی نے اس منصوبے کی طویل المدتی اہمیت کو اجاگر کرتے ہوئے طلبہ کے لیے مختلف زبانوں میں مہارت حاصل کرنے کی ضرورت پر زور دیا، تاکہ وہ تعلیمی اور پیشہ ورانہ سطح پر مزید کامیاب ہو سکیں۔
اس تقریب میں دیگر معزز مہمانوں کے علاوہ بریگیڈیئر شہزاد منیر، ڈائریکٹر جنرل نمل، سید جنید اخلاق، ڈائریکٹر جنرل وفاقی نظامات تعلیم، جوائنٹ سیکرٹری وزارت تعلیم کیپٹن آصف بھٹی، پروفیسر ڈاکٹر جمیل اصغر جامی، ڈین فیکلٹی آف لینگویجز نمل، اور ڈاکٹر سید وقاص علی، رجسٹرار نمل نے بھی شرکت کی۔
Short Link: https://urdu.app.com.pk/urdu/?p=576368
