اسلام آباد۔28جنوری (اے پی پی):وزیراعظم محمد شہباز شریف نے نوجوانوں کو تبدیلی کی نوید قرار دیتے ہوئے کہا ہے کہ قومی ترقی و پالیسی سازی میں نوجوانوں کا کردار بڑھانے کی ضرورت ہے،تعلیم کو فروغ دے کر نوجوانوں کو بااختیار بنایا جا سکتا ہے،نوجوان پرامن اور خوشحال مستقبل کی ضمانت ہیں، چیلنجز سے نمٹنے میں دولت مشترکہ کے رکن ممالک کے درمیان بہترین شرکت داری کا پلیٹ فارم ہے، وزیراعظم یوتھ پروگرام نوجوانوں کی ترقی اور بہبود کا فلیگ شپ پروگرام ہے۔
انہوں نے ان خیالات کا اظہار منگل کو یہاں کامن ویلتھ ایشیا یوتھ الائنس (کایا) سمٹ کی افتتاحی نشست سے خطاب کرتے ہوئے کیا۔تقریب میں وفاقی وزراء ، ارکان پارلیمنٹ، غیر ملکی مندوبین، نیشنل یوتھ کونسل کے ارکان اور سفارتکار بھی موجود تھے۔ اس موقع پر وزیراعظم نے کامن ویلتھ ایشیا یوتھ الائنس سیکرٹریٹ کا افتتاح بھی کیا۔ وزیراعظم نے حکومت اور عوام کی طرف سے سمٹ کے شرکاءکا خیر مقدم کرتے ہوئے کہا کہ کامن ویلتھ ایشیا یوتھ سمٹ کی میزبانی پر خوشی ہے۔وزیراعظم نے کہا کہ پاکستان دولت مشترکہ کا بانی رکن ہے،پاکستان دولت مشترکہ اور اس کے اداروں کو بہت اہمیت دیتا ہے یہ ایک اہم پلیٹ فارم ہے جو شراکت داری کے قیام اور اتفاق رائے پیدا کرنے کا ذریعہ ہے، دولت مشترکہ کی 60 فیصد آبادی کی عمر 30 سال سے کم ہے۔
انہوں نے کہا کہ دولت مشترکہ ممالک کا مستقبل نوجوانوں پر منحصر ہے، ہمیں نوجوانوں کی صلاحیتوں کو نکھارنا ہوگا، نوجوانوں کو جدید ٹیکنالوجی اور فنی تعلیم سے آراستہ کرنا ہے، نوجوان پرامن اور خوشحال مستقبل کی ضمانت ہیں۔ وزیراعظم نے کہا کہ پاکستان کی 70 فیصد آبادی کی عمر 30 سال سے کم ہے، ہم اپنی اس صلاحیت سے بخوبی واقف ہیں اور ہم اس کو ایک موقع میں تبدیل کر سکتے ہیں جو پاکستان کی ترقی اور خوشحالی میں اپنا بھرپور کردار ادا کر سکتے ہیں۔
وزیراعظم نے کہا کہ نوجوان نہ صرف کل کے لیڈر ہیں بلکہ آج بھی تبدیلی کے محرک ہیں، نوجوانوں کو جدید ٹیکنالوجی اور فنی تعلیم سےآ راستہ کرنا ہو گا، قومی تعمیر کی کاوشوں میں انہیں بھرپور شرکت کا حامل بنانے کی ضرورت ہے، ہمیں نوجوانوں کی صلاحیتوں کا ادراک ہے،نوجوان تبدیلی کی نوید ہیں ،قومی ترقی و پالیسی سازی میں ان کا کردار بڑھانا ہے۔ قوم کی تعمیر وترقی میں نوجوانوں کے کردار کو نظر انداز نہیں کیا جا سکتا۔ وزیراعظم نے کہا کہ میں نے ہمیشہ نوجوانوں کی ترقی و بہبود پر توجہ دی ہے اپنی تمام سیاسی زندگی میں نوجوانوں کو با اختیار بنانے کے حوالے سے اقدامات اٹھائے ہیں ۔پرائم منسٹر یوتھ پروگرام نوجوانوں کی ترقی و بہبود کا فلیگ شپ پروگرام ہے ، سابق وزیراعظم نواز شریف نے نوجوانوں کے لیے بہت سے مواقع فراہم کئے اور ان کے لئے کئی پروگرام شروع کئے، ہم نے طلبہ و طالبات کو معیاری تعلیم کی فراہمی کے لیے پنجاب بھر میں دانش سکولز قائم کئے ہیں، آزاد کشمیر ، گلگت بلتستان ،بلوچستان اور دیگر دور دراز علاقوں میں بھی دانش سکول قائم کئے جا رہے ہیں ،نوجوانوں کی بہبود و ترقی کے حوالے سے پنجاب اور وفاق نے متعدد منصوبے شروع کئے جن میں پنجاب ایجوکیشن انڈومنٹ فنڈ کے ذریعے کم مالی وسائل کے حامل طلبا وطالبات کو وظائف کی فراہمی کو یقینی بنایا گیا ہے۔
انہوں نے کہا کہ طلبہ وطالبات کے لئے لیپ ٹاپ کی فراہمی انتہائی اہمیت کا حامل منصوبہ ہے جس سے طلبہ اپنی تعلیمی ضروریات پوری کر سکتے ہیں ،وزیراعظم نے کہا کہ آزاد کشمیر، گلگت بلتستان اور بلوچستان سمیت پورے ملک کے طلبا وطالبات کو لیپ ٹاپ فراہم کئےجا رہے ہیں۔ پرائم منسٹر یوتھ پروگرام کے ذریعے 6لاکھ ہونہار اور مستحق طلبا کو لیپ ٹاپ دیے گئے ہیں، کورونا وائرس کی عالمگیر وبا ءکے دوران یہ لیپ ٹاپ تعلیم کا ذریعہ بنے۔ وزیراعظم نے کہا کہ تعلیم کو فروغ دے کر نوجوانوں کو با اختیار بنایا جا سکتا ہے،ہمارا مستقبل با اختیار نوجوانوں کے ہاتھ میں ہے۔قبل ازیں چیئرمین پرائم منسٹر یوتھ پروگرام رانا مشہود احمد نے مندوبین کا خیرمقدم کرتے ہوئے کہا کہ علاقائی کمیونٹی کی حیثیت سے ان کی یہاں موجودگی یکجہتی کے جذبے کی عکاس ہے۔انہوں نے کہا کہ کامن ویلتھ ایشیا یوتھ سیکرٹریٹ کا قیام خوش آئند اور پاکستان کے نوجوانوں پر اعتماد کا مظہر ہے۔ انہوں نے کہا کہ کامن ویلتھ ایشیا یوتھ الائنس نوجوان قیادت کے متحرک کردار کو تقویت دینے کا موثر پلیٹ فارم مہیا کرے گا اور یہ ہماری اقوام کی نوجوان نسل کے مابین مکالمے کے فروغ میں سہولت دے گا ۔
یہ پلیٹ فارم وضع کردہ ویژن کو عملی جامہ پہناتے ہوئے نوجوانوں کو ترقی، جدت اور جامع شمولیت کے عمل میں ہراول دستے کا کردار ادا کرنے کے فعال مواقع میسر کرے گا۔ رانا مشہود نے کہا کہ موجودہ حکومت نوجوانوں کی صلاحیتوں کو نکھارنے اور ہر شعبہ زندگی میں آگے بڑھنے کے لئے دوررس اقدامات اٹھا رہی ہے ۔ انہوں نے کہا کہ نوجوان نسل کو مواقع فراہم کرنے اور انہیں با اختیار بنانے سے ملک ترقی کرے گا کیونکہ یہی نوجوان کل ملک کی باگ ڈور سنبھالیں گے ۔انہوں نے کہا کہ دانش سکولز اور نوجوانوں کو قرض فراہم کرنے جیسے اقدامات قابل تحسین ہیں۔افتتاحی نشست میں دولت مشترکہ کی سیکرٹری جنرل کا ویڈیو پیغام بھی چلایا گیا جس میں نوجوانوں کی ترقی میں حکومت پاکستان کی پیشرفت اور دولت مشترکہ کی کمیونٹی میں اس کی نمایاں شراکت کا اعتراف کیا گیا۔ تقریب کے شرکا ءکو پاکستان میں سیاحت کے بارے میں ویڈیو بھی دکھائی گئی۔
وزیراعظم نے کایا سمٹ میں 20 نوجوانوں کوموسمیاتی تبدیلی اور یوتھ ایکسیلنس ایوارڈ بھی دیئے۔ دریں اثناء کایا سمٹ میں قیادت کی استعداد کار،شراکت داروں کا انتظام اور وسائل کو متحرک کرنے سے متعلق سیشن کا انعقادہوا جس میں شرکا ءنے مختلف تجاویز اور آراء پر تبادلہ خیال کیا۔ شرکا ءنے کم عمری میں شادی سمیت دیگر مسائل کو اجاگر کیا۔ شرکا ءنے نوجوانوں کو با اختیار بنانے پر توجہ مرکوز کی۔کایا سمٹ میں موسمیاتی اقدامات سے متعلق اعلی سطحی گول میز مباحثہ بھی منعقد کیا گیا جس میں علاقائی سطح پر موسمیاتی تبدیلی کے اثرات سے نمٹنے کے لیے اقدامات پر غور کیا گیا۔ لیڈرشپ سے متعلق سیشن میں دستاویزی فلم بھی دکھائی گئی۔
کایا سمٹ 2025 کے دوران پرائم منسٹرز یوتھ پروگرام کے تحت نوجوان پاکستانیوں کی کامیابیوں اور تخلیقی صلاحیتوں کو اجاگر کرنے کے لیے "سپارک "میگزین کا اجراء بھی کیا گیا۔ وزیراعظم محمد شہباز شریف نے نیشنل یوتھ کونسل کے ارکان، کلائمیٹ چیمپئنز اور میگزین ٹیم کے ہمراہ گروپ فوٹوز بھی بنوائے۔
Short Link: https://urdu.app.com.pk/urdu/?p=552859
