اسلام آباد۔25جولائی (اے پی پی):وزیر اعظم محمد شہباز شریف نے نوجوانوں کو یکساں روزگار کے مواقع فراہم کرنے کے حوالے سے مربوط لائحہ عمل تیار کرنے کی ہدایت کرتے ہوئے کہا ہے کہ پاکستان کی نوجوان آبادی ہمارا اثاثہ ہے، ملکی ترقی نوجوانوں کی فلاح و بہبود سے جڑی ہے،نوجوانوں کو روزگار کی فراہمی حکومت کی اولین ترجیح ہے۔
جمعرات کو وزیر اعظم آفس کے میڈیا ونگ سے جاری بیان کے مطابق وزیراعظم کی زیر صدارت پرائم منسٹر یوتھ پروگرام کے حوالے سے اجلاس یہاں منعقد ہوا۔اس موقع پر اظہار خیال کرتے ہوئے وزیر اعظم نے کہا کہ نوجوان آبادی پاکستان کا اثاثہ ہے اور ملکی ترقی ان کی فلاح و بہبود سے جڑی ہوئی ہے،پاکستانی نوجوانوں میں بے پناہ ٹیلنٹ موجود ہے۔
وزیراعظم نے کہا کہ نوجوانوں کو وسائل فراہم کئے جائیں تو وہ ملک کی تقدیر بدل سکتے ہیں،نوجوانوں کو روزگار کی فراہمی حکومت کی اولین ترجیح ہے۔ وزیراعظم نے ہدایت کی کہ نوجوانوں کو یکساں روزگار کے مواقع فراہم کرنے کے حوالے سے مربوط لائحہ عمل تیار کیا جائے۔ وزیر اعظم نے کہا کہ نیشنل ووکیشنل اینڈ ٹیکنیکل ٹریننگ کمیشن کے تمام تر تربیتی پروگرامز کا محور روزگار کی فراہمی ہونا چاہیے ،جاب مارکیٹ کا تفصیلی سروے کروا کر اس کے مطابق ترجیحی شعبوں میں سکل ٹریننگ کا آغاز کیا جائے۔
اجلاس کو پی ایم یوتھ پروگرام کے حوالے سے بریفنگ میں بتایا گیا کہ پی ایم لیپ ٹاپ سکیم کے تحت اب تک 6 لاکھ لیپ ٹاپس دیئے جا چکے ہیں،اس سال نوجوانوں میں میرٹ پر ایک لاکھ لیپ ٹاپس تقسیم کئے جائیں گے،گزشتہ تین سالوں میں یوتھ سکلز ڈویلپمنٹ پروگرام کے تحت تربیت حاصل کرنے والوں میں 64 فیصد کو باعزت روزگار ملا۔
بریفنگ میں بتایا گیا کہ پی ایم نیشنل انوویشن ایوارڈ کے تحت 100 سٹارٹ اپس کو فنڈ کیا گیا ہے جنہیں ملک بھر میں نامزد انکیوبیشن مراکز میں جگہ دی جا رہی ہے،پی ایم یوتھ سپورٹس لیگ کے تحت 10 بین الاقوامی معیار کی سپورٹس اکیڈمیز اور ایک بائیو مکینیکل لیبارٹری اس سال کام شروع کر دے گی۔بریفنگ میں بتایا گیا کہ پرائم منسٹر گرین یوتھ پروگرام کے تحت نوجوانوں کو ماحولیاتی تبدیلی سے بچاؤ اور ایکو -انوویشن کے حوالے سے تربیت فراہم کی جا رہی ہے اس حوالے سے ملک بھر کی 268 جامعات پر توجہ مرکوز کی جائے گی،
نیشنل یوتھ ایمپلائمنٹ پالیسی 2024 کی تیاری حتمی مراحل میں ہے۔بریفنگ میں بتایا گیا کہ پالیسی کا محور نوجوانوں کو با عزت روزگار کی فراہمی کے مواقع پیدا کرنے اور ورک فورس کی خواتین کی شرح میں اضافہ ہو گا،پی ایم ڈیجیٹل حب جو ایک ون ونڈو آپریشن ڈیش بورڈ ہو گا تیار کیا جا رہا ہے۔اجلاس میں وفاقی وزیر اقتصادی امور احد خان چیمہ ، وفاقی وزیر اطلاعات و نشریات عطا اللہ تارڑ ، وزیر مملکت برائے انفارمیشن ٹیکنالوجی و ٹیلی کام شزا فاطمہ ، چیئر مین پی ایم یوتھ پروگرام رانا مشہود ، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران نے شرکت کی
Short Link: https://urdu.app.com.pk/urdu/?p=487319
