لاہور۔9ستمبر (اے پی پی):نگران وزیراعلی پنجاب محسن نقوی کی زیرصدارت ہفتہ کے روز وزیر اعلی آفس میں اجلاس منعقد ہواجس میں انسپکٹر جنرل پولیس نے تھانوں کی اپ گریڈیشن وڈیزائن، ڈولفن پولیس اورپولیس رسپانس یونٹ کے امور پربریفنگ دی-چیف سیکرٹری،انسپکٹر جنرل پولیس،ایڈیشنل آئی جی سپیشل برانچ،ایڈیشنل چیف سیکرٹری داخلہ، سی سی پی اولاہور، سیکرٹری خزانہ، سیکرٹری تعمیرات و مواصلات، ڈی آئی جی آپریشنز اور متعلقہ حکام نے اجلاس میں شرکت کی۔
نگران وزیراعلی پنجاب محسن نقوی نے کہا کہ پنجا ب بھر میں تھانوں کی تعمیرو مرمت اوراپ گریڈیشن ہوگی،ڈولفن پولیس کی موٹر بائیکس اورپولیس رسپانس یونٹ کی گاڑیاں کوٹھیک کرایا جائے گا،اپ گریڈ کیے جانے والے تھانوں میں بہترین معیار کے فرنٹ ڈیسک، انویسٹی گیشن روم، ویٹنگ ایریا اور واش رومز ہوں گے۔وزیر اعلی محسن نقوی نے ڈولفن پولیس کی موٹر بائیکس اور پولیس رسپانس یونٹ کی گاڑیاں ایک ماہ کے اندر ٹھیک کرانے اورفوری ریلیف کیلئے کرایہ پربلڈنگ لے کرنئے تھانے قائم کرنے کی ہدایت کر دی ہے۔
انہوں نے کہا کہ نئے تھانے بنانے میں بہت و قت او رپیسہ لگے گا،ضرورت کے مطابق کرائے پر بلڈنگ لے کرپولیس سٹیشن بنائے جائیں، تھانے میں سائلین کو زیادہ سے زیادہ سہولتیں دی جائیں اوربہترین فرینڈلی ماحول ہونا چاہیے۔وزیراعلی نے تھانوں میں صفائی ستھرائی کے معیار کو بہتر بنانے کی ہدایت کی اور کہا کہ فرنٹ ڈیسک پر ڈیوٹی پر مامور اہلکارکو یونیفارم میں ہوناچاہیے۔
Short Link: https://urdu.app.com.pk/urdu/?p=388524
