راولپنڈی۔25فروری (اے پی پی):نیوزی لینڈ کرکٹ ٹیم کے نوجوان بیٹر ریچن روندرا نے ون ڈے انٹرنیشنل کرکٹ میں نئی تاریخ رقم کر دی۔ ریچن روندرا نے راولپنڈی سٹیڈیم میں بنگلہ دیش کے خلاف چیمپئنز ٹرافی کے میچ میں شاندار سنچری سکور کی۔ اس طرح وہ آئی سی سی ون ڈے ورلڈ کپ اور چیمپئنز ٹرافی میں اپنے ڈیبیو میچ میں سنچری بنانے والے دنیا کے پہلے بیٹر بن گئے ہیں۔ 2023 میں بھارت میں ہونے والے ون ڈے ورلڈ کپ میں انہوں نے انگلینڈ کے خلاف سنچری بنائی تھی۔
یہ ان کا ورلڈ کپ میں ڈیبیو میچ تھا۔ کرکٹ کی تاریخ میں ریچن روندرا واحد کھلاڑی ہیں جنہوں نے دونوں ٹورنامنٹس میں یہ کارنامہ انجام دیا۔ 25 سالہ روندرا کی بنگلہ دیش کے خلاف سنچری ون ڈے کرکٹ میں محض 30 اننگز میں چوتھی سنچری تھی اور ان کی تمام سنچریاں آئی سی سی ایونٹس میں ہیں۔ 2023 ورلڈ کپ میں انہوں نے 3 سنچریاں بنائی تھیں۔ اب ریچن روندرا آئی سی سی ایونٹس میں سب سے زیادہ سنچریاں بنانے والے کیوی بیٹر بن گئے ہیں۔ اس سے قبل نیتھن ایسٹل اور کین ولیمسن کے نام تین ، تین سنچریاں تھیں۔
Short Link: https://urdu.app.com.pk/urdu/?p=565837
