اسلام آباد۔3نومبر (اے پی پی):وزارت انسانی حقوق نے رواداری اور انسانی حقوق کے احترام اور بین المذاہب ہم آہنگی کو فروغ دینے کے لیے مختلف ذرائع سے آگاہی مہم شروع کی ہے۔ اتوار کو اے پی پی سے گفتگو کرتے ہوئے وزارت انسانی حقوق کے حکام نے کہا کہ مہم کا مقصد پرامن معاشرے کے لیے مذہبی عدم برداشت کا مقابلہ کرنا ہے۔ انہوں نے کہا کہ اس مہم کے ذریعے تعلیمی اداروں بشمول سکولوں، کالجوں، یونیورسٹیوں اور سرکاری و نجی شعبے کی تنظیموں میں انسانی حقوق کے بارے میں معلومات پھیلائی جائیں گی۔
انہوں نے کہا کہ اس مہم کا مقصد ہدف بنائے گئے اضلاع میں انسانی حقوق کے بارے میں آگاہی پیدا کرنا ہے تاکہ جمہوریت اور قیادت کو بہتر بنایا جا سکے، انصاف تک رسائی کو آسان بنایا جا سکے اور لوگوں کو بطور انسان ان کے حقوق جاننے کے قابل بنایا جا سکے۔
انہوں نے مزید کہا کہ اس سے اسلام میں انسانی حقوق کے احترام اور پاکستان کے آئین میں درج بنیادی انسانی حقوق اور انسانی حقوق کے ملکی قومی قوانین کے بارے میں لوگوں کی سمجھ اور معلومات میں اضافہ ہوگا۔انہوں نے کہا کہ یہ مہم دیہی اور شہری برادریوں کو انسانی حقوق کے بعض مسائل خاص طور پر صنفی بنیاد پر تشدد کے حوالے سے رویے میں تبدیلی کے لیے حساس بنائے گی۔
