اسلام آباد۔16فروری (اے پی پی): وزیر اعظم محمد شہباز شریف زلزلہ متاثرین کے ساتھ یکجہتی کے لئے 16 اور 17 فروری کو ترکیہ کا دورہ کریں گے۔جمعرات کووزیراعظم آفس کے میڈیاونگ سے جاری بیان کے مطابق انقرہ میں اپنے قیام کے دوران وزیراعظم ترکیہ کے صدر رجب طیب ایردوان سے ملاقات کریں گے اور زلزلے سے قیمتی جانوں کے ضیاع پر تعزیت اور بڑے پیمانے پر ہونے والے نقصان پر پوری پاکستانی قوم کی جانب سے دلی ہمدردی کا اظہار کریں گے۔
وزیراعظم مشکل کی اس گھڑی میں ترک عوام کے شانہ بشانہ کھڑے ہونے اور جاری امدادی کوششوں میں ہر ممکن تعاون جاری رکھنے کے پاکستان کے پختہ عزم کا اعادہ کریں گے۔وزیراعظم جنوبی ترکیہ میں زلزلے سے متاثرہ علاقوں کا دورہ بھی کریں گے اور علاقے میں تعینات پاکستانی سرچ اینڈ ریسکیو ٹیموں کے ساتھ ساتھ زلزلہ متاثرین سے بھی بات چیت کریں گے۔
جنوبی ترکی میں تباہ کن زلزلے کے تناظر میں، وزیر اعظم نے 6 فروری کو صدر رجب طیب ایردوان سے ٹیلی فون پر بات کی تھی اور انہیں ریسکیو اور ریلیف کی کوششوں میں ہر ممکن مدد کی یقین دہانی کرائی تھی۔پاکستان کی جانب سے اپنے ترک بھائیوں اور بہنوں کی مدد کے لیے تمام دستیاب وسائل کو مکمل طور پر متحرک کر دیا گیا ہے۔
وزیر اعظم ذاتی طور پر امدادی سرگرمیوں کی نگرانی کر رہے ہیں۔واضح رہے کہ پاکستان اور ترکی کے درمیان گہرے برادرانہ تعلقات ہیں۔ہمارے دونوں ممالک ہر آزمائش اور مصیبت میں ایک دوسرے کے شانہ بشانہ کھڑے رہے ہیں۔ترکیہ میں 6 فروری کو تباہ کن زلزلہ سے ہزاروں افراد جاں بحق ہوئے۔
Short Link: https://urdu.app.com.pk/urdu/?p=351515
