اسلام آباد ۔ 25 ستمبر (اے پی پی) قائمہ کمیٹی برائے اطلاعات و نشریات کے چیئرمین اور پاکستان تحریک انصاف کے سینیٹر فیصل جاوید نے کہا ہے کہ وزیر اعظم عمران خان نے اپوزیشن کے این آر او کے مطالبہ کو مسترد کردیا ہے ، پی ٹی آئی ملک کی پہلی سیاسی جماعت ہے جو جمہوری جدوجہد سے قائم ہوئی اور پھر اقتدار میں آئی۔ جمعہ کو نجی ٹی وی چینل سے بات چیت کرتے ہوئے انہوں نے کہا کہ عمران خان پر الزام لگانے والے خود اسٹیبلشمنٹ کی مدد سے اقتدار میں آئے ۔ انہوں نے کہاکہ وزیراعظم عمران خان 22 سالہ سیاسی جدوجہد اور عوام کی حمایت کے ساتھ بر سر اقتدار آئے ہیں، سینٹر فیصل جاوید نے کہا کہ وزیر اعظم قومی دولت لوٹنے والوں کو این آر او نہیں دیں گے، ہماری پارٹی کا منشور ملک سے بدعنوانی کا خاتمہ ہے، آل پارٹیز کانفرنس سے متعلق ایک سوال کے جواب میں انہوں نے کہا کہ اپوزیشن کی پوری مشق کا مقصد کرپشن کیسز سے نجات حاصل کرنا ہے جسے اپنے عزائم میں ناکامی ہوگی۔
