اسلام آباد ۔ 27 دسمبر (اے پی پی) وزیر اعظم عمران خان نے جمعرات کو پمز ہسپتال کا اچانک دورہ کیا۔ وزیر اعظم نے بہتر انتظامات اور سروسز کی فراہمی پر ہسپتال انتظامیہ کی کارکردگی کو سراہا ۔وزیر اعظم نے مریضوں کو ادویات کی فراہمی سے متعلق ہسپتال انتظامیہ سے استفسار کیا۔ انہوں نے ہسپتال میں زیر علاج مریضوں سے بھی بات چیت کی ، مریضوں نے علاج اور دیگر سہولیات کے حوالے سے اطمینان کا اظہار کیا۔ وزیراعظم عمران خان نے ہسپتال کے نیوروسرجری، آرتھوپیڈک ، امراض چشم، اور ایمرجنسی سمیت مختلف شعبوں کا دورہ کیا ۔ انہوں نے ہسپتال انتظامیہ کو ہدایت کی کہ مریضوں کو معیاری علاج کی سہولیات فراہمی کے تسلسل کو جاری رکھا جائے۔ وزیر صحت عامر کیانی، معاون خصوصی افتخار درانی، سینیٹر فیصل جاوید اور نوشیروان برکی وزیر اعظم کے ہمراہ تھے۔
