اسلام آباد۔1فروری (اے پی پی):وفاقی وزیر بین الصوبائی رابطہ ڈاکٹر فہمیدہ مرزا نے کہا ہے کہ وزیر اعظم عمران کے وژن کے مطابق ملک میں گراس روٹ سطح پر کھیلوں کی ثقافت کو زندہ کرنے کے لئے اقدامات کئے جا رہے ہیں۔ ان خیالات کا اظہار انہوں نے گذشتہ روز وزیر کھیل پنجاب رائے تیمور خان بھٹی سے اپنے دفتر اسلام آباد میں ملاقات کے دوران کیا، ملاقات میں وزیر کھیل ونوجوانان پنجاب، رائے تیمور خان بھٹی کے علاوہ ڈائریکٹر جنرل، سپورٹس پنجاب، عدنان ارشد اولکھ بھی موجود تھے، ملاقات میں کویوڈ ۔19 وبائی امراض کے بعد کھیلوں کی بحالی ، کھیلوں کی پالیسی ، سابق کھلاڑیوں کی فلاح و بہبود، کھیلوں کے بنیادی ڈھانچے کی تعمیر اور بہتر روابت کے مختلف امور پر تبادلہ خیال کیا گیا۔ صوبائی وزیر کھیل نے وفاقی وزیر ڈاکٹر فہمیدہ مرزا کو صوبائی کھیلوں کی پالیسی کی تیاری اور اس کی نمایاں خصوصیات بشمول کھلاڑیوں کو مفت طبی خدمات اور صحت کی انشورنس ، صوبے بھر میں خواتین کے لئے وقف جمنازیم کے قیام اور مختلف صلاحیتوں کے حامل فعال بچوں کے لئے مفت کھیلوں کی سہولیات سے آگاہ کیا۔ ڈاکٹر فہمیدہ مرزا نے صوبائی محکمہ کھیل کے لئے ہر ممکن تعاون کا یقین دلایا ۔ صوبائی وزیر رائے تیمور خان بھٹی نے وفاقی وزیر ڈاکٹر فہمیدہ مرزا کو پنجاب سپورٹس کمپلیکس اور کھیلوں کی دیگر سہولیات کا دورہ کرنے کی دعوت دی، جس کو ڈاکٹر فہمیدہ مرزا نےقبول کیا۔ ڈاکٹر فہمیدہ مرزا نے ملک میں کلب ،تحصیل ، ضلعی اور صوبائی سطح پر کھیلوں کی ثقافت کو زندہ کرنے پر زور دیتے ہوئے کہا کہ یہ وزیر اعظم عمران خان کے وژن کے مطابق ہے۔ انہوں نے یہ بھی کہا کہ ڈسٹرکٹاسپورٹس آفیسرز کی بھرتی کے عمل میں میرٹ کو یقینی بنانا نتیجہ خیز نتائج کا فائدہ اٹھا سکتا ہے، حکومت اور دیگراسپورٹس فیڈریشنوں کو نچلی سطح پر کھلاڑیوں کی صلاحیتوں کی نشونما میں مدد کرسکتا ہے۔ وفاقی وزیر نے کہا کہ حکومت پہلے ہی اپنا کردار ادا کررہی ہے لیکن کھیلوں کی بحالی کا حقیقی وژن تب ہی حاصل ہوسکتا ہے جب کھیلوں کے تمام سٹیک ہولڈرز جن میں قومی فیڈریشنز، صوبائی ایسوسی ایشنز اور میڈیا کا باہمی تعاون نہایت اہم کردار ادا کرسکتا ہے۔ وزیر کھیل پنجاب نے ڈاکٹر فہمیدہ مرزا کی پاکستان میں کھیلوں کے انفرااسٹرکچر کی بہتری کے لئے ان کی کاوشوں کی تعریف کی۔
