تیانجن۔1ستمبر (اے پی پی):وزیراعظم محمد شہباز شریف اور آذربائیجان کے صدر الہام علییوف نے تجارت، سرمایہ کاری، توانائی، مواصلات، دفاع، تعلیم اور عوام سے عوام کی سطح پر دوطرفہ تعاون کے فروغ اور علاقائی رابطوں کے منصوبوں اور ایس سی او سمیت کثیر الجہتی فریم ورک کے تحت تعاون بڑھانے کی اہمیت پر زور دیتے ہوئے بین الاقوامی فورمز پر قریبی ہم آہنگی برقرار رکھنے پر اتفاق کیا ہے۔پیر کو وزیراعظم آفس کے میڈیا ونگ سے جاری بیان کے وزیر اعظم محمد شہباز شریف اور جمہوریہ آذربائیجان کے صدر الہام علییوف نے یہاں شنگھائی تعاون تنظیم کے سربراہان مملکت کی کونسل کے اجلاس کے موقع پر ملاقات کی۔ وزیراعظم نے آذربائیجان اور آرمینیا کے درمیان تاریخی امن معاہدے پر دستخط کرنے پر صدر علییوف کو مبارکباد دی جو جنوبی قفقاز میں دیرپا امن اور استحکام کی جانب ایک اہم قدم ہے۔
دونوں رہنماؤں نے تجارت، سرمایہ کاری، توانائی، مواصلات، دفاع، تعلیم اور عوام سے عوام کے تبادلوں میں دوطرفہ تعاون کے مکمل دائرہ کار کا جائزہ لیا اور پاکستان آذربائیجان تعلقات میں بڑھتی ہوئی رفتار پر اطمینان کا اظہار کیا۔ دونوں رہنماؤں نے علاقائی خوشحالی اور انضمام کو فروغ دینے کے لئے علاقائی رابطوں کے منصوبوں اور کثیر الجہتی فریم ورک بشمول ایس سی او کے تحت تعاون بڑھانے کی اہمیت پر زور دیا۔ انہوں نے ابھرتے ہوئے عالمی چیلنجوں کے بارے میں بھی نقطہ نظر کا اشتراک کیا اور متعلقہ بین الاقوامی فورمز پر قریبی ہم آہنگی برقرار رکھنے پر اتفاق کیا۔آذربائیجان کے صدر نے پاکستان کے مختلف علاقوں میں جاری سیلابی صورتحال کے نتیجے میں قیمتی جانوں کے نقصان اور مالی نقصانات پر گہرے افسوس کا اظہار کرتے ہوئے کہا کہ مشکل کی اس گھڑی میں آذربائیجان کی حکومت اور عوام پاکستان کے ساتھ کھڑے ہیں۔ وزیراعظم نے صدر الہام علییوف کو جلد پاکستان کے دورے کی دعوت بھی دی۔
