اسلام آباد۔7مارچ (اے پی پی):وزیر اعظم محمد شہباز شریف نے چین پاکستان اقتصادی راہداری کے تحت مختلف اقدامات اور منصوبوں کے بروقت نفاذ اور تکمیل کو یقینی بنانےکیلئے دونوںممالک کو مل کر کام کرنے کی اہمیت پر زور دیتے ہوئے کہا ہے کہ دونوں ممالک کی قیادت اور عوام تعلقات کو نئی بلندیوں تک پہنچانےکیلئے پرعزم ہیں۔
ان خیالات کا اظہار انہوں نے پاکستان میں تعینات چین کے سفیر جیانگ زیڈونگ سے گفتگو کرتے ہوئے کیا جنہوں نے جمعہ کو وزیراعظم ہائوس میں ان سے ملاقات کی۔ وزیراعظم آفس کے میڈیا ونگ سے جاری بیان کے مطابق ملاقات کے دوران وزیراعظم نے چین کے صدر شی جن پنگ اور وزیر اعظم لی کیانگ کے لئے نیک خواہشات کا اظہار کیا۔
انہوں نے قومی عوامی کانگریس اور چینی عوامی سیاسی مشاورتی کانفرنس کے "دو اجلاسوں” کے کامیاب انعقاد پر چینی قیادت اور قوم کو مبارکباد بھی دی۔پاکستان اور چین کے دوطرفہ سٹریٹجک تعلقات کی مثبت رفتار جس کا مظہر صدر آصف علی زرداری کا حالیہ دورہ چین ہے، پر اطمینان کا اظہار کرتے ہوئے وزیراعظم نے تمام بنیادی مسائل پر پاکستان کی دیرینہ اور مسلسل حمایت پر چین کا شکریہ ادا کیا۔
انہوں نے چین کے قومی دلچسپی کے امور پر پاکستان کی مسلسل اور غیر متزلزل حمایت کا بھی اعادہ کیا اور کہا کہ دونوں ممالک کی قیادت اور عوام پاک چین "آل ویدر سٹریٹجک کوآپریٹو پارٹنرشپ” کو مزید مضبوط کرنے اور اسے نئی بلندیوں تک پہنچانے کے لئے پر عزم ہیں۔ملاقات میں دونوں ممالک کے درمیان سکیورٹی اور انسداد دہشت گردی تعاون پر پیشرفت پر بھی تبادلہ خیال کیا گیا۔ وزیراعظم نے مسرت کا اظہار کیا کہ اس سال صدر شی جن پنگ کے 2015 میں پاکستان کے تاریخی دورے کی دسویں سالگرہ منائی جا رہی ہے ۔
اس سلسلے میں وزیراعظم نے اس یادگار موقع کو شایان شان طریقے سے منانے کی ہدایات جاری کیں۔ انہوں نے صدر شی جن پنگ کو پاکستان کا سرکاری دورہ کرنے کے لئے اپنی انتہائی پرخلوص دعوت کی بھی تجدید کی۔ ملاقات کے دوران وزیر اعظم نے چین –
پاکستان اقتصادی راہداری کے تحت مختلف اقدامات اور منصوبوں کے بروقت نفاذ اور تکمیل کو یقینی بنانے کے لئے دونوں فریقوں کو مل کر کام کرنے کی اہمیت کو اجاگر کیا۔چینی سفیر نے چینی قیادت کے لئے نیک خواہشات پر وزیراعظم کا شکریہ ادا کیا۔ انہوں نے وزیراعظم کو پاک چین دوطرفہ تعاون کی تازہ ترین پیشرفت سے آگاہ کیا۔
ملک میں میکرو اکنامک صورتحال کو بہتر بنانے میں حکومت کی کامیابیوں کو سراہتے ہوئے چینی سفیر نے اس بات کا اعادہ کیا کہ چین پاکستان کی قومی ترقی کوششوں میں اپنی مکمل حمایت اور تعاون جاری رکھے گا۔
Short Link: https://urdu.app.com.pk/urdu/?p=570022
