اسلام آباد ۔ 13 جون (اے پی پی) وزیر اعظم کے معاون خصوصی برائے صحت ڈاکٹر ظفر مرزا نے کورونا کے مریضوں کے استعمال ہونے والے انجکشن کی قلت اور زیادہ نرخ کی وصولی پر سختی سے نوٹس لیتے ہوئے ڈریپ کو ہدایت کی ہے کہ منافع خوروں اور زائد قیمت پر ادویہ فروخت کرنے والوں کے خلاف سخت قانونی کارروائی عمل میں لائی جائے۔ ہفتہ کو وزارت صحت کے ترجمان کے مطابق کورونا میں مبتلا شدید بیمار مریضوں کیلئے ٹوسیلیزوماب (ایکٹیمرا) انجکشن11952 فی وایل منظورِ شدہ قیمت ہے جبکہ 200mg کا انجکشن 29882 فی وایل ہے اور 400mg کا انجکشن 59764 روپے فی وایل ہے ۔ زائد وصولی کی شکایات ڈریپ کے ٹول فری 080003727 نمبر پر درج کرائیں جس پر ڈریپ منافع خوروں کے خلاف سخت ترین کارروائی کرے گا ۔ ڈاکٹر ظفر مرزا نے کہا کہ حکومت کورونا وائرس کے مریضوں کیلئے علاج کیلئے موثر اقدامات کو یقینی بنا رہی ہے۔ مارکیٹ میں ریمڈیسویر انجکشن کی دستیابی کو یقینی بنانے کیلئے 2 امپورٹرز اور 12 لوکل مینوفیکچررز کو اجازت دی گئی ہے۔اس سلسلہ میں ڈرگ پرائسنگ کمیٹی کا اجلاس کا انعقاد کی بھی ہدایت کی گئی ہے جس میں قانون کے مطابق ریمڈیسویر کی کم سے کم قیمت کا تعین کیاجائے گا تاہم حتمی منظوری وفاقی حکومتی دے گی۔ انہوں نے کہا کہ اب تک ریمڈیسویر کی محدود مقدار صرف مریضوں کیلئے امپورٹ کی جارہی تھی جبکہ نئے اقدامات کے تحت اب دوا وافر مقدار میں موجود ہوگی ۔یہ دوائیں مختلف اسپتالوں کی ضروریات کو پورا کرنے کے لئے ایک مربوط میکنزم کے ذریعے شدید بیمار مریضوں کے لئے تقسیم کی جائیں گی۔ ایکٹیمرا انجکشن کی زائد قیمت وصول کرنے والوں کے خلاف سخت کاروائی کی جائے گی۔ کورونا میں استعمال ہونے والے انجکشن کی مختصر فراہمی کی اطلاعات پر ہم نے فوری کارروائی کی وسیع پیمانے پر کوششوں کے بعد توسیلزوماب انجکشن کی دستیابی کی صورتحال میں بہتری دیکھنے میں آئی ہے۔
