کوئٹہ۔ 15 اگست (اے پی پی):وزیر اعلیٰ بلوچستان میر سرفراز بگٹی جمعرات کو ایک روزہ دورے پر تربت پہنچے ۔کمشنر مکران داؤد خلجی ، ڈپٹی کمشنر کیچ اسماعیل اِبراھیم اور دیگر حکام نے وزیر اعلیٰ بلوچستان کا تربت ایئرپورٹ پر استقبال کیا۔ وزیر اعلی ٰ بلوچستان کے ہمراہ صوبائی وزیر میر ظہور بلیدی، بخت محمد کاکڑ، رکن صوبائی اسمبلی مینا مجید ، چیف سیکرٹری بلوچستان شکیل قادر خان بھی موجود تھے ۔
وزیر اعلیٰ بلوچستان شہید ذاکر بلوچ کے گھر گئے جہاں انہوں نے شہید کے والد کنر بلوچ سے فاتحہ خوانی و تعزیت کی اور شہید کے بلند درجات کی بلندی اور پسماندگان کے صبر جمیل کے لئے دعا کی ۔ شہید کے والد اور موجود عزیز و اقارب سے گفتگو کرتے ہوئے انہوں نے کہا کہ شہید ذاکر بلوچ حکومت بلوچستان کے ایک باصلاحیت نوجوان افسر تھے،ان کی قربانی وطن کے لیے مشعل راہ ہے جسے کبھی فراموش نہیں کیا جا سکتا۔ انہوں نے کہا کہ شہید کا خون کبھی رائیگاں نہیں جائے گا ، ملک و قوم کے لئے جانوں کا نذرانہ پیش کرنے والے ہمارے قومی ہیرو ہیں، ذاکر بلوچ ہمیشہ ہمارے دلوں میں رہیں گے۔
