وزیر اعلیٰ مریم نواز شریف نے عوام سے جو وعدے کیے تھے وہ پورے ہو رہے ہیں،صہیب احمد بھرتھ

راولپنڈی۔ 08 جولائی (اے پی پی):صوبائی وزیر قانون و مواصلات صہیب احمد بھرتھ نے کہا ہے کہ وزیر اعلیٰ پنجاب مریم نواز شریف کے ویژن کی روشنی میں ترقیاتی منصوبے بروقت مکمل ہو رہے ہیں۔ نواز شریف فلائی اوور بمقام اڈیالہ روڈ کی تکمیل پر اپنے بیان میں صوبائی وزیر قانون نے کہا کہ قلیل ریکارڈ مدت میں نواز شریف فلائی اوور اور جی پی او چوک انڈر پاس راولپنڈی مکمل کیے گئے، جو راولپنڈی کے عوام کے لیے وزیر اعلیٰ پنجاب کا تحفہ ہیں۔

انہوں نے مزید کہا کہ وزیر اعلیٰ مریم نواز شریف نے عوام سے جو وعدے کیے تھے وہ پورے ہو رہے ہیں۔ ترقیاتی منصوبوں کی بروقت تکمیل سے عوام الناس کو سہولیات اور آسانیاں میسر آئیں گی ۔ انہوں نے کہا کہ معیاری سفری سہولیات کی فراہمی یقینی بنائی جا رہی ہے، عوام کی خدمت ہمارا نصب العین ہے اور اسی جذبے کے تحت حکومت پنجاب ترقیاتی ایجنڈے پر عمل پیرا ہے۔