راولپنڈی۔ 24 اپریل (اے پی پی):وزیر اعلیٰ پنجاب مریم نواز شریف نے راولپنڈی میں ڈویلپمنٹ پراجیکٹس کے دورے کیے۔وزیر اعلیٰ نے راولپنڈی جی پی او انڈر پاس اور محمد نوازشریف فلائی اوور پراجیکٹ کا دورہ کیااورپراجیکٹ کے تعمیراتی معیار کا جائزہ لیا۔اس موقع پر انہوں نے کہا کہ راولپنڈی کی تاریخ کے سب سے بڑے پراجیکٹ کی ریکارڈ مدت میں تکمیل قابل تعریف ہے۔وزیر اعلیٰ پنجاب نے 31مئی تک پراجیکٹ کی متوقع تکمیل پر اظہار مسرت کیااورشاباش دی۔
انہوں نے ہاتھ ہلا کر پراجیکٹ پر کام کرنے والے مزدوروں کی گرم جوشی کا جواب دیا۔ مریم نواز شریف نے جاری تعمیراتی سرگرمیوں کا بھی معائنہ کیا۔انہوں نے پراجیکٹ میں تعمیراتی معیار کو ہر صورت یقینی بنانے کی ہدایت کی۔وزیرعلیٰ نےروڈز کے اطراف میں دورویہ درخت لگانے کا بھی حکم دیا۔وزیر اعلی کو بریفنگ میں بتا یا گیا کہ راولپنڈی مال روڈ کو سگنل فری بنانے کے لئے مزید دو انڈر پاسز بنائے جائیں گے۔ انڈر پاس سے روزانہ دو لاکھ گاڑیاں با آسانی گزرسکیں گی۔
انڈر پاس بننے سے اے ایف آئی سی اور ایم ایچ کے مریضوں کو سڑک عبور کرنے میں آسانی ہوگی۔بریفنگ میں بتا یا گیا کہ مجموعی طور پر مال روڈ کو26کلو میٹر تک سگنل فری بنایا جائے گا۔جبکہ محمد نوازشریف فلائی اوور 2.3ارب اور انڈر پاس پراجیکٹ 4.38ارب روپے کی لاگت سے مکمل کیا جائے گا۔تاہم محمد نوازشریف فلائی اوور کی تعمیر کا کام 85 فیصد اور انڈر پاس کی تعمیر 60فیصد تک مکمل ہوچکی ہے۔سیکرٹری سی اینڈ ڈبلیو نے وزیر اعلی کو زیر تکمیل پراجیکٹ کے بارے میں بھی تفصیلی بریفنگ دی۔بریفنگ میں بتا یا گیا کہ محمد نوازشریف فلائی اوور کے اووہیڈ برج کی پائلز کی تنصیب کا کام مکمل کر لیا گیا ہے۔فلائی اوور کے56 گر ڈرز تیار،32گرڈرز فلائی اوور پرنصب کر دیئے گئے۔
محمد نوازشریف فلائی اوور کے7 ڈرین کی تعمیر کا کام تیزی سے جاری ہے۔جبکہ فلائی اوور کی باؤنڈری وال بھی مکمل کر لی گئی۔وزیر اعلیٰ مریم نواز شریف نے مال روڈ جی پی او چوک پر انڈرپاس کی تعمیراتی سرگرمیوں کا بھی جائزہ لیا۔بریفنگ میں بتا یا گیا کہ انڈر پاس کے 2093 پائل اور گرڈررکی تعمیر مکمل کر لیا گیا ہے۔جس میں پیدل گزرنے والے شہریوں کے لئے خصوصی راستہ بھی پراجیکٹ میں شامل ہے۔جبکہ راولپنڈی ڈویژن میں 56 ترقیاتی منصوبوں پر کی تعمیر پر کام جاری ہے۔
بریفنگ میں مزید بتایا گیا کہ نوازشریف فلائی اوور کی تکمیل سے شہریوں کو موٹروے اور راولپنڈی رنگ روڈ تک براہ راست رسائی ممکن ہوگی۔محمد نوازشریف فلائی اوور کی تکمیل سے79ہزار گاڑیاں مستفید ہونگی۔اس موقع پر رکن قومی اسمبلی محترمہ طاہرہ اوورنگ زیب ، سینئر منسٹر مریم اوور نگ زیب , چیف سیکرٹری زاہد زمان اختر اور دیگر حکام بھی موجود تھے۔
Short Link: https://urdu.app.com.pk/urdu/?p=587227
