لاہور۔17مارچ (اے پی پی):وزیر اعلیٰ پنجاب مریم نواز کے عوام دوست تاریخی پیکیج کے تحت پاکستان کی تاریخ میں پہلی مرتبہ عوام کا حق عوام کی دہلیز پرمل رہا ہے، 30لاکھ سے زائد گھرانوں کو ان کی دہلیز پر نگہبان رمضان پیکیج مل گئے۔
وزیراعلی ٰمریم نوازکی ہدایت پر سواتین کروڑ سے زائد افراد کے لئے 30ارب کا نگہبان رمضان پیکیج دیاجارہا ہے،جس کے تحت 64لاکھ گھرانوں کو نگہبان رمضان پیکیج کی ترسیل جلد مکمل کر لی جائے گی۔وزیراعلی نے کہا کہ نگہبان رمضان پیکیج میں شفافیت یقینی بنانے کے لئے ہر بیگ پر کیو آر کوڈ پرنٹ کیا گیا ہے۔
نگہبان رمضان پیکیج کی ترسیل کے لئے کمپیوٹرائز شناختی کارڈ اور کیو آر کوڈ کے ذریعے ترسیل کو یقینی بنایا گیا ہے۔ عوام کو ان کا حق ان کی دہلیز پر پہنچانا ہمارا فرض ہے، کسی پر احسان نہیں۔ انہوں نے کہا کہ خدمت کا سفر نئے جذبے کے ساتھ شروع ہوچکا ہے۔ پنجاب کے عوام کو معاشی ریلیف کے لئے تمام ممکنہ اقدام ضرور کریں گے۔
نگہبان رمضان پیکیج پنجاب کی تاریخ کا پہلا اور منفرد پروگرام ہے۔ انہوں نے کہا کہ64لاکھ افراد کو ان کی دہلیزپر رمضان پیکیج کی ترسیل پاکستان مسلم لیگ(ن) کا منفرد ریکارڈ ہے۔
وزیر اعلیٰ کی ہدایت پر نگہبان رمضان پیکیج کے لئے خصوصی ہیلپ لائن-02345 0800 قائم کی گئی ہے۔عوام نگہبان رمضان پیکیج کے بارے میں نگہبان ہیلپ لائن پر شکایات درج کراسکتے ہیں۔ 72گھنٹے میں ہر شکایت کا ازالہ ضرور ہوگا۔
Short Link: https://urdu.app.com.pk/urdu/?p=448992
