اسلام آباد۔15ستمبر (اے پی پی):وزیر خارجہ جلیل عباس جیلانی نے 12 سے 15 ستمبر کو لندن میں دولت مشترکہ کے یوتھ منسٹرز کے 10ویں اجلاس کی صدارت کی۔ دولت مشترکہ کے 45 سے زیادہ ملکوں کے یوتھ منسٹرز نے اجلاس میں شرکت کی جو دولت مشترکہ کی جانب سے 2023 کو "نوجوانوں کے سال” کے طور پر منانے کے ایک حصے کے طور پر منعقد کیا گیا تھا۔ جمعہ کو دفتر خارجہ کی جانب سے جاری بیان کے مطابق اجلاس کی صدارت کرتے ہوئے وزیر خارجہ نے عالمی پائیدار ترقی کے ایجنڈے میں نوجوانوں کی شمولیت کو ترتیب دینے میں دولت مشترکہ کے کردار پر زور دیا۔
انہوں نے کہا کہ دولت مشترکہ کی آبادی کا 60 فیصد نوجوانوں پر مشتمل ہے جو ہمارا سب سے بڑا اثاثہ ہے۔ شرکاء نے نوجوانوں کے لئے مواقع پیدا کرنے کی اہم ضرورت پر بھی غور کیا تاکہ وہ اپنی صلاحیتوں کا بھرپور ادراک کرسکیں۔ وزیر خارجہ نے شرکاء کو حکومت پاکستان کے فلیگ شپ یوتھ پروجیکٹ ’’پرائم منسٹر یوتھ پروگرام‘‘ کے بارے میں بتایا جس نے 10 سال مکمل کر لئے ہیں۔ وزیر خارجہ نے کہا کہ یہ پروگرام کامن ویلتھ یوتھ پروگرام کے چار ای ایس کے تحت طے شدہ مقاصد کے ساتھ قریب سے ہم آہنگ ہے یعنی مشغولیت، تعلیم، روزگار اور ماحولیات۔ حکومت پاکستان نے فور ایز میں سے ہر ایک کے تحت مخصوص وعدے کرتے ہوئے 80 ارب روپے کے منصوبے مختص کرکے موجودہ مالی سال کے لئے نوجوانوں کی ترقی کے لئے اپنے عزم کا اعادہ کیا ہے۔
اجلاس کے موقع پر وزیر خارجہ نے دولت مشترکہ کے سیکرٹری جنرل اور سری لنکا، روانڈا، جمیکا اور ساموا کے یوتھ منسٹرز کے ساتھ دو طرفہ ملاقاتیں کیں۔ وزیر خارجہ نے دولت مشترکہ کے سیکرٹری جنرل، لندن کے میئر اور لندن میں پاکستانی ہائی کمیشن کی جانب سے دیے گئے استقبالیہ میں بھی شرکت کی۔ اجلاس کے مقام پر روایتی ٹرک آرٹ اسکوٹرز اور نیلے مٹی کے برتنوں میں پاکستان کے متحرک رنگوں اور ڈیزائنوں کی شاندار نمائش کی گئی جسے شرکاء نے بہت سراہا۔ بیان کے مطابق پاکستان دولت مشترکہ کو بہت اہمیت دیتا ہے اور تنظیم کے ساتھ اپنی قریبی مصروفیات جاری رکھنے کے لئے پرعزم ہے۔
