اسلام آباد ۔ 12 مارچ (اے پی پی) وزیر خارجہ شاہ محمود قریشی نے کہا ہے کہ ہماری حکومت معاشرتی اور اقتصادی تعمیر و ترقی کے ایجنڈے پر عمل پیرا ہے، پاکستان خطے میں امن کا خواہاں ہے یہی وجہ ہے کہ بھارتی جارحیت کے باوجود وزیراعظم عمران خان نے جذبہ خیر سگالی کے تحت گرفتار بھارتی پائلٹ کو بھارت کے حوالے کیا۔ ان خیالات کا اظہار انہوں نے منگل کو جرمن وزیر خارجہ ہائیکو ماس سے ملاقات کے دوران کیا۔ انہوں نے جرمن وزیر خارجہ کی وزارتِ خارجہ آمد پر خیر مقدم کیا۔ ملاقات کے دوران دو طرفہ تعلقات، خطے میں امن و امان کی صورتحال اور افغانستان میں قیام امن سمیت مختلف امور پر تبادلہ خیال کیا گیا۔ وزیر خارجہ مخدوم شاہ محمود قریشی نے پلوامہ واقعہ کے بعد بھارت کی طرف سے دراندازی اور اس کے نتیجے میں خطے میں امن و امان کی کشیدہ صورتحال سے آگاہ کیا۔ اس موقع پر شاہ محمود قریشی نے کہا کہ ہماری حکومت معاشرتی اور اقتصادی تعمیر و ترقی کے ایجنڈے پر عمل پیرا ہے۔ پاکستان خطے میں امن کا خواہاں ہے یہی وجہ ہے کہ بھارتی جارحیت کے باوجود وزیر اعظم عمران خان نے جذبہ خیر سگالی کے تحت بھارتی پائلٹ کو بھارت کے حوالے کیا۔ ملاقات کے دوران جرمن وزیر خارجہ ہائیکو ماس نے کہاکہ ہم افغانستان میں قیام امن کے لئے پاکستان کی خدمات کو قدر کی نگاہ سے دیکھتے ہیں۔ انہوں نے کہاکہ افغانستان میں قیام امن کے لئے پاکستان کا موثر کردار قابل تحسین ہے۔ انہوں نے دونوں ممالک کو اپنے معاملات مذاکرات کے ذریعے حل کرنے پر زور دیا۔ اس موقع پر دونوں وزرائے خارجہ نے دوطرفہ تجارتی، اقتصادی اور ثقافتی تعاون اور سرمایہ کاری میں فروغ پر بھی اتفاق کیا۔
