مظفر آباد۔22مئی (اے پی پی):وزیر ماحولیات عامر عبد الغفار لون نے آزاد جموں وکشمیر تحفظ ماحولیات ایجنسی میں نو قائم شدہ ماحولیاتی مانیٹرنگ سسٹم کا افتتاح کردیا۔ آزاد جموں و کشمیر تحفظ ماحولیات ایجنسی میں انتہائی اہمیت کی حامل لیبارٹریز کا قیام ایک اہم سنگ میل کی حیثیت رکھتا ہے ۔ وزیر ما حولیات آزاد کشمیرعامر عبد الغفار لون نے اداراتی سطح پر کی جانے والی کاوشوں کو سراہتے ہوئے ہدایت کی کہ ان لیبارٹریز با کوفی الفور فنکشنل کرتے ہوئے ریاستی فضائی و آبی آلودگی کے بارے میں عوام کو آگاہ کیا جائے اور آلودگی کی تخفیف کیلئے عملی اقدامات کئے جائیں اور ماحولیاتی قوانین کو نافذ العمل کیا جائے
تا کہ ادارہ تحفظ ماحول کی بنیادی ذمہ داری سے نبرد آزما ہو سکے۔ماحولیاتی ما نیٹر نگ سسٹم تین لیبارٹریز پرمشتمل ہے جن میں فضائی آلودگی کو مانیٹر کرنے کی موبائل لیبارٹری جس کے تحت ریاست بھر میں فضائی آلودگی کی موجودہ کیفیت کی سائنسی بنیادوں پر جانچ پڑتال اور عوامی آگاہی کیلئے الیکٹرانک میڈیا کے ذریعے شائع کرنے کے ساتھ حفاظتی اقدامات کے بارے میں رہنمائی فراہم کی جا سکے گی۔
آبی ذخائر (چشمہ جات، واٹر سپلائی سکیمز، ندی نالہ جات اور ویسٹ واٹر) کی ریاستی ماحولیاتی معیارات کے مطابق ٹیسٹ کرنے کی لیبارٹری جس کے تحت ریاست میں موجود پینے کے پانی کے ذخائر اور ویسٹ واٹر کی سالانہ بنیادوں پر واٹر کوالٹی رپورٹ پروفائلنگ کی جائے گی۔ گاڑیوں سے اخراج ہونے والے دھویں کی جانچ پڑتال کرنے کی موبائل لیبارٹری جس کے تحت گاڑیوں کے اخراج (دھواں) و قابل رفتار کیفیت کی جانچ پڑتال کی جائے گی اور ریاستی ماحولیاتی قوانین کا نفاذ عمل میں لایا جائے گا۔
Short Link: https://urdu.app.com.pk/urdu/?p=468169
