اسلام آباد۔12مارچ (اے پی پی):وزیراعظم محمد شہباز شریف سے پاکستان کے مختلف چیمبرز آف کامرس کے صدور نے ملاقات کی ، انہوں نے معاشی استحکام پر حکومتی ٹیم کی تعریف اور مشاورتی عمل کا حصہ بنانے پر اظہار تشکر کیا جبکہ وزیراعظم محمد شہباز شریف نے ہدایت کی ہے کہ تمام وزارتیں اور متعلقہ سیکریٹریز چیمبرز آف کامرس سے مشاورت کے بعد ان کی تجاویز پر پالیسی اقدامات کا لائحہ عمل پیش کریں۔
بدھ کو وزیراعظم آفس کے میڈیا ونگ سے جاری کردہ بیان کے مطابق وزیر اعظم محمد شہباز شریف سے پاکستان کے چیمبرز آف کامرس کے صدور نے یہاں ملاقات کی۔ ملاقات میں وفاقی وزراء رانا تنویر حسین، احد خان چیمہ، محمد اورنگزیب، عطاء اللہ تارڑ، حنیف عباسی، سردار اویس خان لغاری، شزہ فاطمہ خواجہ، علی پرویز ملک، وزیر مملکت بلال اظہر کیانی، معاون خصوصی ہارون اختر، وزیر اعظم کے کوآرڈینیٹر رانا احسان افضل اور متعلقہ اعلی حکام نے شرکت کی۔
اس موقع پر گفتگو کرتے ہوئے وزیراعظم نے کہا کہ معاشی استحکام کا حصول پہلا زینہ ہے، ملکی ترقی کا سفر اب شروع ہوا ہے، معیشت کی ترقی کیلئے سب کو مل کر کام کرنا ہے۔ انہوں نے کہا کہ کاروباری برادری کے مسائل کا حل اولین ترجیح ہے، حکومت آپ کا بھرپور ساتھ دے گی، پاکستانی کاروباری برادری نے مشکل معاشی حالات کے باوجود صنعت و تجارت کا سلسلہ جاری رکھا، حکومت کاروباری برادری کی سہولت کے لیے ہرممکن اقدام اٹھا رہی ہے۔
وزیر اعظم نے کہا کہ ایف بی آر کی ڈیجیٹائزیشن اور دیگر اصلاحات کی بدولت کاروباری برادری کو سہولت فراہم کر رہے ہیں، فیس لیس کلیئرنس سسٹم سے بندرگاہوں پر کنٹینرز کی کلیئرنس کے وقت میں خاطر خواہ کمی آئی ہے، تاجر برادری حکومت کے ٹیکس ریونیو میں اضافے کیلئے سسٹم میں اصلاحات پر اپنی تجاویز دے۔ وفد کے شرکا نے گفتگو کرتے ہوئے کہا کہ وزیر اعظم کی قیادت میں ملک معاشی استحکام کے بعد ترقی کی جانب بڑھ رہا ہے، کاروباری برادری کے مسائل کے حل کے لیے پہلی مرتبہ حکومتی سطح پر سنجیدگی کا مظاہرہ کیا جا رہا ہے۔
انہوں نے کہا کہ کاروباری برادری کو مشاورتی عمل بالخصوص بجٹ کے مشاورتی عمل میں شامل کرنا خوش آئند ہے، اس پر وزیر اعظم کے مشکور ہیں۔ ملاقات میں چیمبرز آف کامرس کے صدور نے مسائل کے حل کیلئے تجاویز پیش کیں۔ وزیر اعظم نے متعلقہ وزارتوں اور سیکریٹریز کو چیمبرز سے مشاورت کے بعد ان کی تجاویز پر مبنی پالیسی اقدامات کا لائحہ عمل پیش کرنے کی ہدایت کی۔
Short Link: https://urdu.app.com.pk/urdu/?p=571642
