اسلام آباد۔9جولائی (اے پی پی):وزیراعظم محمد شہباز شریف نے انٹرمیڈیٹ اینڈ سیکنڈری ایجوکیشن بورڈ لاہور کے امتحان میں دانش سکول کے طالب علم محمد آیان کاشف کو اول آنے پر مبارکباد دی ہے اور کہا ہے کہ دانش سکول کا دائرہ پورے پاکستان میں پھیلائیں گے اور علم کے نور سے ملک میں تبدیلی لائیں گے۔
منگل کو وزیراعظم میڈیا آفس سے جاری بیان کے مطابق وزیراعظم نے کہا کہ دانش سکول میانوالی کے محمد آیان کاشف نے بورڈ کے امتحان میں 1190 نمبر لے کر اپنی قابلیت کا لوہا منوایا ہے۔محمد آیان، ان کے اہل خانہ اور اساتذہ کو دل کی گہرائیوں سے مبارکباد پیش کرتا ہوں۔انہوں نے کہا کہ دانش سکول کے بچے اور بچیاں کامیابی اور قابلیت کی نئی مثال بن کر ابھر رہے ہیں، دانش سکول کا دائرہ پورے پاکستان میں پھیلائیں گے اور علم کے نور سے ملک میں تبدیلی لائیں گے۔
وزیراعظم نے بورڈ امتحان میں دوئم آنے والے معاذ حیدر اور تیسری پوزیشن حاصل کرنے والی ماہین سجاد، سائنس گروپ میں دوسری پوزیشن حاصل کرنے والی تین طالبات عبیرہ اشرف، زینب آصف اور سحر شکیل کو بھی مبارکباد دی ہے۔
Short Link: https://urdu.app.com.pk/urdu/?p=483152
