اسلام آباد ۔ یکم جولائی (اے پی پی) وزیراعظم عمران خان نے کہا ہے کہ سمگلنگ کے ناسور نے ملکی معیشت کوبھاری نقصان پہنچایا ہے، صنعتی عمل کو فروغ دینے کی حکومتی کوششوں کو بارآور بنانے کے لئے ضروری ہے کہ سمگلنگ کے ناسور پر موثر طریقے سے قابو پایا جائے۔ انہوں نے یہ بات پیر کو سمگلنگ کی روک تھام کے سلسلے میں اعلیٰ سطح کے اجلاس کی صدارت کرتے ہوئے کہی۔ اجلاس میں وزیرِ داخلہ برگیڈئیر (ر) اعجاز احمد شاہ، مشیر خزانہ ڈاکٹر عبدالحفیظ شیخ، مشیر تجارت عبدالرزاق داو¿د، معاون خصوصی ڈاکٹر فردوس عاشق اعوان، آرمی چیف جنرل قمر جاوید باجوہ، ڈی جی آئی ایس آئی، سیکرٹری داخلہ میجر (ر) اعظم سلیمان، سیکرٹری کامرس احمد نواز سکھیرا، چیئرمین ایف بی آر شبر زیدی، چیف سیکرٹری خیبرپختونخواہ، چیف سیکرٹری بلوچستان و دیگر سینئر ملٹری اور سویلین افسران شریک تھے۔ اجلاس میں سمگلنگ کی وجہ سے ملکی معیشت کو درپیش مسائل اور اسکے نتیجے میں ملکی صنعت کو پہنچنے والے نقصانات پر کامرس، وزارتِ داخلہ اور ایف بی آر کی جانب سے تفصیلی بریفنگ دی گئی۔ اجلاس سے خطاب کرتے ہوئے وزیرِ اعظم عمران خان نے کہا کہ سمگلنگ کے ناسور نے ملکی معیشت کوبھاری نقصان پہنچایا ہے۔ صنعتی عمل کو فروغ دینے کی حکومتی کوششوں کو بارآور بنانے کے لئے ضروری ہے کہ سمگلنگ کے ناسور پر موثر طریقے سے قابو پایا جائے۔ وزیرِ اعظم نے کہا کہ ملک کوقرضوں کی دلدل سے نکالنے کے لئے ضروری ہے کہ جہاں ایک طرف زراعت کو ترقی دی جائے وہاں دوسری طرف صنعتی شعبے کو بھی فروغ دیا جائے جس کے لئے ضروری ہے کہ سمگل شدہ اشیا کی درآمد اور خرید و فرخت کی یکسر روک تھام کی جائے۔
