اسلام آباد۔22اپریل (اے پی پی):وزیراعظم کے معاون خصوصی برائے صنعت و پیداوار ہارون اختر خان کی زیرِ صدارت منگل کو ایک اعلیٰ سطحی اجلاس منعقد ہوا جس میں نیشنل فرٹیلائزر کارپوریشن (این ایف سی ) کی مجموعی کارکردگی کا جائزہ لیا گیا اور کھاد کی قیمتوں اور پیداوار سے متعلق امور پر تبادلہ خیال کیا گیا۔اجلاس میں وزارتِ صنعت و پیداوار کے سیکرٹری سیف انجم بھی موجود تھے۔
ہارون اختر خان نے اجلاس کے دوران مختلف کھاد کمپنیوں کی قیمتوں میں فرق کا تفصیل سے جائزہ لیا اور کہا کہ کسانوں کو ریلیف دینا حکومت کی اولین ترجیح ہے۔انہوں نے کہا کہ کسانوں کو سہولت فراہم کرنے کے لئے کھاد بنانے والی کمپنیوں کو سستی گیس فراہم کی گئی ہے۔ انہوں نے کہا کہ تمام کھاد ساز اداروں کو مناسب قیمت پر گیس کی فراہمی یقینی بنائی جائے گی اور گیس کی سپلائی صرف کھاد کے لئے مخصوص کی جائے گی۔
اجلاس میں ملک بھر میں یوریا کی پیداوار اور قیمتوں پر بھی تفصیلی تبادلہ خیال کیا گیا۔ ہارون اختر خان نے یوریا کی پیداوار، قیمت اور ریٹیل ریٹس پر رپورٹ تیار کرنے کی ہدایت جاری کی۔مزید برآں نیشنل فرٹیلائزر کارپوریشن کو نئی ہدایات جاری کرتے ہوئے انہوں نے کہا کہ کھاد سے متعلق مسائل اور ان کے حل پر مبنی ایک جامع بریفنگ وزیراعظم کے لئے تیار کی جائے۔
Short Link: https://urdu.app.com.pk/urdu/?p=585907
