ردیگ ۔18مئی (اے پی پی):وزیرِ اعظم محمد شہباز شریف اور ایرانی صدر ابراہیم رئیسی نےتحصیل مند کے علاقے ردیگ میں مند۔پشین ۔بارڈر مارکیٹ اور 100 میگاواٹ گبد-پولان بجلی کی ٹرانسمیشن لائن کا افتتاح کردیا۔
اس موقع پر وزیرخارجہ بلاول بھٹو زرداری، وفاقی وزیر توانائی انجینئر خرم دستگیر ، وفاقی وزیر اطلاعات و نشریات مریم اورنگزیب اور وزیراعلیٰ عبدالقدوس بزنجو بھی موجود تھے۔ وزیراعظم شہبازشریف کے گوادر پہنچنے پر بلوچستان کے وزیراعلی ٰ عبدالقدوس بزنجو نے ان کا خیرمقدم کیا جس کے بعد وزیراعظم مند ۔پشین۔ بارڈر مارکیٹ کے افتتاح کے لئے تحصیل مند کے علاقے ردیگ پہنچے جہاں پر ایران کے صدر ابراہیم رئیسی نے وزیراعظم کا پرتپاک خیرمقدم کیا۔
اس موقع پر دونوں رہنمائوں نے گرم جوشی سے مصافحہ کیا۔ وزیراعظم محمد شہبازشریف اور ایرانی صدر ابراہیم رئیسی نے مند۔ پشین ۔ بارڈر مارکیٹ کا افتتاح کیا اور دونوں رہنمائوں نے مارکیٹ کے مختلف حصوں کا معائنہ کیا اور دوستی کی علامت کے طورپر پودا بھی لگایا۔ بارڈر مارکیٹ کےقیام سےدونوں ممالک کے درمیان تجارت کے فروغ میں مدد ملے گی۔ سرحد کے دونوں اطراف رہنے والے لوگوں کیلئے روزگار کے مواقع پیدا ہونگے اور سمگلنگ کی روک تھام کی جا سکے گی۔اس کے علاوہ بھی حکومت مزید 5 بارڈر مارکیٹس پربھی کام کر رہی ہے جن کو جلد تجارت کیلئے کھول دیا جائے گا۔
بعدازاں وزیراعظم محمد شہبازشریف اور ایران کے صدر ابراہیم رئیسی نے 100 میگاواٹ گبد-پولان بجلی کی ٹرانسمیشن لائن کا بھی افتتاح کیا۔ گبد-پولان ٹرانسمیشن لائن وزیرِ اعظم محمد شہباز شریف کی ذاتی دلچسپی کی بدولت ریکارڈ مدت میں تعمیر مکمل ہوئی ہے۔ اس ٹرانسمیشن لائن کی تکمیل سے ایران سے درآمد کی جانے والی سستی بجلی کی مجموعی مقدار 204 میگاواٹ ہو گئی ہے۔132کے وی کی ٹرانسمیشن لائن کو اپ گریڈ کرکے 220 کے وی کردیا گیا ہے۔4 ماہ کی ریکارڈ مدت میں یہ منصوبہ مکمل کیا گیا ہے۔
نئی ٹرانسمیشن لائن سے بلوچستان کے سرحدی علاقوں میں بجلی کی ترسیل میں بہتری آئے گی اور کاروباری سرگرمیوں کے لئے بجلی کی وافر مقدر میسر آئے گی۔ اس منصوبے کی تکمیل سے وزیراعظم شہبازشریف کا بلوچستان میں بلاتعطل بجلی کی فراہمی کا وعدہ پورا ہو گیا ہے
Short Link: https://urdu.app.com.pk/urdu/?p=363909
