کوئٹہ۔ 18 مارچ (اے پی پی):وفاقی محتسب کے حکم پر پشین کے رہائشی درخواست گزار محمد اشرف اور اُن کی اہلیہ کو پاسپورٹ دلوادیئے گئے ، وفاقی محتسب ریجنل افس کوئٹہ میں پشین کے رہائشی درخواست گزار محمد اشرف نے درخواست دائر کی تھی کہ انہوں نے اپنا اور اہلیہ کا پاسپورٹ بنانے کے لئے اپلائی کیا، تاہم پاسپورٹ آفس کی جانب سے انکے پاسپورٹ بنانے میں تاخیر کی جا رہی ہے۔
درخواست گزار کا مزید کہنا تھا کہ انہوں نے اس سلسلے میں کئی بار متعلقہ دفتر سے رابطہ کیا اور دفتر کے چکر لگائے مگر انکی کوئی شنوائی نہیں ہوئی۔بالاخر مجبور ہو کر انہوں نے انصاف کے حصول کی خاطر وفاقی محتسب کے ادارے میں درخواست دائر کی۔
درخواست موصول ہوتے ہی ریجنل افس کوئٹہ کے عملے نے انکوائری کا آغاز کیااور متعلقہ محکمے کے عملے کو طلب کر کے جواب مانگا۔متعلقہ محکمہ جواز پیش کرنے میں ناکام رہا۔چنانچہ وفاقی محتسب نے احکامات جاری کیے کہ فوری طور پر درخواست گزار کے پاسپورٹ انہیں مہیا کیئے جا ئیں ۔وفاقی محتسب کے احکامات موصول ہوتے ہی متعلقہ محکمے نے درخواست گزار کے پاسپورٹ ان کو دیدیئے۔درخواست گزار نے وفاقی محتسب کے اس احسن اقدام پے شکریہ ادا کیا۔
Short Link: https://urdu.app.com.pk/urdu/?p=573831
