اسلام آباد۔17اکتوبر (اے پی پی):وفاقی وزیر اطلاعات، نشریات، قومی ورثہ و ثقافت عطاء اللہ تارڑ نے شنگھائی تعاون تنظیم کے سربراہان حکومت کی کونسل کے 23 ویں اجلاس کے کامیاب انعقاد پر جمعرات کو قومی اسمبلی اجلاس میں صدر مملکت آصف علی زرداری، وزیراعظم محمد شہباز شریف، حکومت پاکستان اور پاکستان کے عوام کو مبارکباد پیش کرنے کی قرارداد پیش کر دی۔ قرارداد میں کہا گیا ہے کہ یہ ایوان صدر مملکت آصف علی زرداری، وزیراعظم محمد شہباز شریف، نائب وزیراعظم و وزیر خارجہ محمد اسحاق ڈار، سپیکر قومی اسمبلی ایاز صادق سمیت سابق سپیکر صاحبان جنہوں نے علاقائی تعاون کے فروغ کے لئے اپنا کردار ادا کیا، کو خراج تحسین پیش کرتا ہے۔ یہ ایوان ایس سی او کے اہداف اور مقاصد کے حصول کے لئے حکومت پاکستان کی جانب سے مکمل حمایت کے عزم کے اظہار کو سراہتا ہے۔
قرارداد میں کہا گیا ہے کہ یہ ایوان سمجھتا ہے کہ 27 سال بعد پاکستان میں شنگھائی تعاون تنظیم جیسا کوئی بڑا ایونٹ کامیابی سے منعقد ہوا، شنگھائی تعاون تنظیم سربراہ اجلاس کی میزبانی پاکستان کے لئے اہم سنگ میل ہے، یہ ایوان حکومت کو سفارتی محاذ پر ملنے والی کامیابیوں پر خراج تحسین پیش کرتا ہے۔ قرارداد میں مزید کہا گیا کہ یہ ایوان سمجھتا ہے کہ ایس سی او سربراہ اجلاس سے پاکستان کا مثبت تشخص ابھرا ہے۔ ایس سی او سربراہ اجلاس کے کامیاب انعقاد سے پاکستان کو علاقائی تجارت میں مدد اور امن و استحکام کو فروغ ملے گا۔ یہ ایوان شنگھائی تعاون تنظیم کے خطے میں سیاسی، اقتصادی، دفاعی اور سلامتی کے مسائل پر اہم کردار کو تسلیم کرتا ہے۔ یہ ایوان سمجھتا ہے کہ پاکستان خطے کا اہم اور متحرک ملک ہے، خطے کے اہم علاقائی اور سلامتی کے مسائل پر ایس سی او کانفرنس میں پاکستان کا مضبوط موقف پاکستانی قوم کی ترجمانی ہے۔
قرارداد میں کہا گیا کہ یہ ایوان حکومت پاکستان، وزارت خارجہ، وزارت اطلاعات، وزارت داخلہ اور قانون نافذ کرنے والے اداروں بشمول پولیس، رینجرز اور پاک فوج کے شنگھائی تعاون تنظیم (ایس سی او) سمٹ کے کامیاب انعقاد کے لئے اہم کردار کو خراج تحسین پیش کرتا ہے۔ قرارداد میں کہا گیا کہ یہ ایوان ایس سی او کانفرنس کے موقع پر وفاقی دارالحکومت کو خوبصورتی سے سجانے، مہمانوں کا خیرمقدم کرنے اور پاکستان کے وقار کو بلند کرنے کے لئے تمام حکومتی اداروں کی خدمات کو سراہتا ہے۔ یہ ایوان ایس سی او سمٹ میں مہمانوں کی پاکستان آمد سے لے کر ان کی رخصتی تک جن اداروں اور آفیشلز نے اپنے فرائض انجام دیئے، ان سب کو پوری قوم کی طرف سے خراج تحسین پیش کرتا ہے۔
