اسلام آباد۔16جون (اے پی پی):وفاقی وزیر امور کشمیر، گلگت بلتستان و سیفران انجینئر امیر مقام نے 100 دن کی مثالی کارکردگی پر وزیراعظم شہباز شریف کو خراج تحسین پیش کیا اور کہا کہ صنعتوں کے لئے بجلی کی فی یونٹ قیمتوں میں کمی کا تاریخی پیکج دے کر وزیراعظم شہباز شریف نے معاشی ترقی کا ایٹمی دھماکہ کیا ہے، روٹی، آٹے اور گھی سمیت کھانے پینے کی اشیا کے بعد پٹرول کی قیمتوں میں مزید کمی عوام اور ریاست دونوں کو ریلیف دینے کی کامیاب پالیسیوں کا نتیجہ ہے۔
وزارت امور کشمیر و گلگت بلتستان اور سیفران کی طرف سے اتوار کو جاری بیان میں انجینئر امیر مقام نے کہا کہ 100 دن میں وزیراعظم شہباز شریف نے ملک اور عوام دونوں کے بوجھ کم کئے، پاکستان اور عوام دونوں کو ریلیف دیا ‘شہباز سپیڈ’ سے 100 دن میں انقلاب برپا ہوگیا، اگلے 1725 دن میں ملک و قوم کی معاشی تقدیر بدلیں گے ۔ انہوں نے کہا کہ وزیراعظم شہباز شریف نے باتوں اور دعووں کی بجائے اللہ کے فضل سے100 فیصد کام کیا،38 فیصد سے مہنگائی کا12 فیصد پر آنا، پٹرول کی قیمت میں35 روپے کا ریلیف، روپے کی قدر میں استحکام اللہ کے فضل اور وزیر اعظم شہباز شریف کی پرخلوص محنت کا نتیجہ ہے۔
وفاقی وزیر امور کشمیر نے کہا کہ زرمبادلہ ذخائر 14 ارب ہونا، برآمدات میں اضافہ، 3 ارب ڈالر سے زائد بیرون ملک سے آنے والی ترسیلات زر، سٹاک ایکسچینج کا 77 ہزار کی حد عبور کرنا معاشی کامیابیوں کا منہ بولتا ثبوت ہے، انہوں نے کہا کہ زراعت، آئی ٹی، معدنیات، توانائی سمیت ہر شعبہ ترقی کی طرف گامزن ہے، خسارے کم ہو رہے ہیں، کرنٹ اکائونٹ خسارہ منفی سے مثبت ہو گیا ہے، سعودی عرب، متحدہ عرب امارات اور کویت وغیرہ سے اربوں ڈالر کی سرمایہ کاری سے روزگار اور کاروبار میں اضافہ ہوگا، ملک اور قوم دونوں کو مزید ریلیف ملے گا۔
امیر مقام نے کہا کہ چین ہر سال 3 لاکھ پاکستانی نوجوانوں کو آئی ٹی میں مفت تربیت دے گا، وزیر اعظم شہباز شریف کی کوششوں سے ہونے والے اس اقدام سے نوجوانوں کا مستقبل روشن ہوگا۔
انہوں نے کہا کہ ”پوری تیاری ہے” کے دعویدار جعلی انقلابیوں کو100 دن میں یہ سمجھ نہیں آئی تھی کہ آئی ایم ایف جانا ہے یا نہیں؟۔ وفاقی وزیر نے کہا کہ 9 مئی کو ریاست اور شہدا کے وقار پر حملہ کرنے والے مجرموں کی لائی تباہی کے اثرات آہستہ آہستہ ختم ہو رہے ہیں۔
Short Link: https://urdu.app.com.pk/urdu/?p=477047
