اسلام آباد۔7اگست (اے پی پی):وفاقی وزیر خزانہ اور ریونیو سینیٹر محمد اسحاق ڈار کی زیر صدارت کابینہ کمیٹی برائے نجکاری (سی سی او پی) کا اجلاس پیر کو منعقد ہوا۔ اجلاس میں وفاقی وزیر برائے صنعت و پیداوار مخدوم سید مرتضیٰ محمود، ایس اے پی ایم برائے خزانہ طارق باجوہ، ایس اے پی ایم برائے ریونیو طارق محمود پاشا، وفاقی سیکرٹریز اور اعلیٰ سرکاری افسران نے شرکت کی۔
سی سی او پی نے نجکاری کے پروگرام میں پاکستان انٹرنیشنل ایئر لائنز کمپنی لمیٹڈ (پی آئی اے سی ایل) کو شامل کرنے کے حوالے سے نجکاری کمیشن کی تجویز پر غور کیا۔ سی سی او پی نے غور و خوض کے بعد پاکستان انٹرنیشنل ایئرلائنز کمپنی لمیٹڈ (پی آئی اے سی ایل) کو پارلیمنٹ کی طرف سے قانون میں ترمیم کے بعد، جاری نجکاری پروگرام کے فعال نجکاری منصوبوں کی فہرست میں شامل کرنے کا فیصلہ کیا۔
نجکاری ڈویژن نے روزویلٹ ہوٹل کی نجکاری کے حوالے سے تفصیلی اپ ڈیٹ پر سمری پیش کی۔ سی سی او پی نے بحث کے بعد پی آئی اے انویسٹمنٹ لمیٹڈ (پی آئی اے-آئی ایل) کے اثاثہ روزویلٹ ہوٹل، نیویارک کے لین دین پر عملدرآمد کے لیے مالیاتی مشیر کی خدمات حاصل کرنے کے لیے نجکاری کمیشن کو منظوری دے دی۔
