اسلام آباد۔3اگست (اے پی پی):وفاقی وزیر خزانہ اور محصولات سینیٹر محمد اسحاق ڈار کی زیر صدارت کابینہ کمیٹی برائے بین الحکومتی تجارتی لین دین کا اجلاس جمعرات کو منعقد ہوا۔ وفاقی وزیر برائے بحری امور سید فیصل علی سبزواری، وفاقی وزیر برائے بجلی خرم دستگیر خان، ایس اے پی ایم برائے خزانہ طارق باجوہ، ایس اے پی ایم ریونیو طارق محمود پاشا، سیکریٹری میری ٹائم افیئرز، سیکریٹری قانون و انصاف، سپیشل سیکریٹری خزانہ، چیئرمین کمیٹی برائے بحری امور اور دیگر متعلقہ حکام نے شرکت کی۔
کے پی ٹی اور ان کی ٹیم اور دیگر اعلیٰ سرکاری افسران بھی اجلاس میں موجود تھے۔ سی سی او آئی جی سی ٹی نے کراچی پورٹ کو یو اے ای اور کے پی ٹی کے درمیان بلک اور جنرل کارگو ایسٹ وارف کراچی پورٹ کے آپریشنز کی آئوٹ سورسنگ کے لیے تجارتی معاہدے کے حوالے سے وزارت سمندری امور کی سمری پر غور کیا۔
سی سی او آئی جی سی ٹی نے بحث کے بعد پرائس ڈسکوری میکانزم کی منظوری دی اور ویسٹ وارف میں بلک اور جنرل کارگو ٹرمینل کی ترقی کے لیے متحدہ عرب امارات اور پاکستان کی نامزد ایجنسیوں کے درمیان طے پانے والے تجارتی معاہدے پر گفت و شنید اور فریم کرنے کے لیے ایک کمیٹی تشکیل دی۔
